Wa’y pinirmahan sa pagbaligya

Dear Atty. Divine,

Naay kabilin nga yuta ang akong lola sa Masbate, nine hectares.  Patay na akong lola ug tulo na lang ka heirs ang buhi karon, lakip na ang akong papa.

Sa diha nga nasakit ang akong lola, usa ko sa migasto. Tungod kay wa’y kuwarta ang mga anak sa akong lola, ilang gisabutan uban sa mga igsuon sa  akong papa nga ibaligya ang share ni lola sa yuta aron magamit sa pagpaospital.

Ako ang mipalit sa share ni lola. Mibayad ko kanila while tua ko sa gawas sa nasud. Apan wa sila’y agreement or Deed of Sale nga gibuhat kay lagi inig-abot na lang kuno nako.

Apan sa dihang namatay na ang akong lola, ang mga igsuon sa akong papa, dili na man mosugot nga ihatag nako ang share ni lola nga akong gibayran.

Ang gusto nila nga ibaligya ang property ug ulian ko sa nagasto. Samtang kadtong mga anak sa mga igsuon nila ni papa nga namatay na, dili man ‘sab nila bahinan.

Karon gipaabangan sa mga igsuon sa akong papa ang yuta ug sila ra ang nagkuha sa abang. Makagukod ba ko nila bisan verbal ra ang among nasabotan kaniadto?

Puwede ba nga kaming mga anak ang molihok sa share ni papa kay wa man sab siya bahini sa abang sa yuta? Makiha ba ang akong mga uyoan kun dili nila hatagan ang mga anak sa namatay nila nga igsuon?

Daghan salamat and more power. — Mae

Dear Mae,

Kun dunay mga testigo nga mopamatuod nga mibayad ka sa kantidad sa maong property ug kun makatestimoniya ang imong mama ug papa kalabot niini, mahimo man nga imo silang gukdon, apan ang problema lang kay medyo dugay ang proseso sa korte ug makagasto ‘sab ka.

Ubos sa atong balaod, kun ang tawo nga namatay dunay gibilin nga utang, ang iyang kabilin nga yuta maoy kuhaan sa pagbayad niini busa  mahimo g’yud nga imong pabayran ang tanan nimong nagasto ug adto kuhaon ang bayad sa properties nga gibilin sa imong lola.

Kun dili makabayad kanimo ang imong mga uyoan sa nagasto nimo, then imo silang sultian nga imong ipadayon ang pagkuha sa share sa imong lola base sa inyong sabot kaniadto.

Ang verbal agreement mahimong makabarug sa korte basta adunay mopamatuod niini. Samtang kalabot ‘sab sa mga igsuon nga namatay na, kun adunay mga anak ang maong mga igsuon, ang ilang mga anak maoy mo-represent sa share sa ilang ginikanan nga namatay.

Busa kun wa bahini ang mga anak sa namatay nga mga igsuon mahimo sila nga modangop sa korte niini. Thanks and God Bless. – Atty.  Divine