Ang pagkatawo ni Senador Poe

Ang dako’ng hagit karon sa kandidatura ni Senador Grace Poe mao ang pagpamatuod kun si kinsa ang tinuod niyang mga ginikanan aron makabuylo na iyang kandidatura sa pagka-presidente.

Samtang magpabiling hanap ang tinuod nga pagkatawo ni Senador Poe, siguradong maapektahan ang iyang kandidatura sa 2016.

Sa nasumitir nga mga dokumento sa birth certificate ni Senador Grace Poe ngadto sa Senate Electoral Tribunal gipakita ini ang proseso giunsa sa pag-angkon sa senador ang iyang citizenship.

Ang unang certificate of live birth ni Senador Poe nga gipetsahan og November 27, 1968 naglatid sa mga kasayuran nga siya kinit-an. Nakit-an siya sa simbahan sa Jaro, Iloilo niadtong Septiyembre 3, 1968 sa alas 9:30am ni Edgardo Militar.

Sa gimakinilya nga dokumento giila ang maong bata nga si Mary Grace Natividad Contreras Militar. Gikan ni Edgardo Militar gihatag siya ngadto sa usa ka Emiliano Militar nga nagpuyo sa Sta. Isabel Street sa Jaro, Iloilo.

Sa susamang dokumento nalatid sab nga gisagop sa magtiayon nga Ronald Allan Poe ug Jesusa Sonora Poe basi sa kamandoan sa Municipal Court sa San Juan, Rizal, ni Judge Alfredo Gorgonio nga gipetsahan og Mayo 13, 1974 si Mary Grace Natividad Contreras Militar.

Sa ikaduhang live birth certificate nga gipetsahan og Mayo 4, 2006 gilatid sa dokumento nga gipakatawo na ni Jesusa Sonora Poe kon Susan Roces si Mary Grace Sonora Poe kansang amahan mao si Ronald Allan Poe kon si Fernando Poe, Jr.  Didto gipakatawo si Mary Grace Sonora Poe sa Jaro, Iloilo City niadtong September 3, 1968.

Ang ikaduhang live birth certificate nga naglatid na sa ngalan nila ni Susan Roces ug Fernando Poe, Jr. nga mga ginikanan ni Mary Grace Sonora Poe resulta na sa adoption process nga gitugot sa korte niadtong Mayo 13, 1974.  Basi sa Civil Registration Law of the Philippines kon ACT 3753 gilatid ini ang pagrehistro sa mga bata nga makit-an o gibiyaan sa ilang mga ginikanan, pinaagi sa Foundling Registration.

Kun adunay petition for adoption sa maong mga bata nga gibiyaan o kinit-an nga itugot sa korte ngadto sa mga nipetisyon alang sa adoption, momando ang korte ngadto sa Local Civil Registrar o sa Department of Social Welfare and Development sa pag-usab sa record sa maong bata.

Sa maong kamandoan dili na unya makita sa birth certificate sa maong bata nga luwatan sa Philippine Statistics Authority ang kaniadto National Statistics Office kon NSO nga siya sinagop.  Apan dili hingpit mapapas sa record sa maong bata nga siya usa ka kinit-an o sinagop.

Kini hinungdan nga kinahanglang iprobar  ni Senador Poe ang tinuod niyang pagkatawo pinaagi sa pag-ila kun si kinsa ang iyang tinuod nga mga ginikanan.

Samtang dili makahatag si Senador Poe og klarong katin-awan sa iyang pagkatawo, dili malikayan ang pagturok sa mga pagduda sa iyang kaligdong, kamatinud-anon ug ang kasihag unya sa iyang pagdumala bisan sa iyang kasamtangang posisyon sa pagka-senador ug sa mas bug-at pa unyang responsibilidad kun siya mapili nga presidente.