Pagpangulitawo ni Leni
Di sayon ang unang pagsuway ni anhing DILG Secretary Jesse Robredo pag-usab sa politika sa iyang Dakbayan sa Naga sa Bicol. Matud sa iyang biyuda, si Kongresista Leni Robredo, napuno sila sa mga pagsaway ug bugalbugal di lang sa ilang politikanhong kaatbang kun dili apil na sab sa mga molupyo.
Ang sentro sa bugalbugal mao ang usa sa mga lagda nga gihuptan ni Robredo pagsegurong magpabilin siyang magtugkad sa yuta: Nga mosugot siyang mangluhod sa kasal ug mangugos og bunyag ubos sa kundisyon nga di siya mohatag og regalo. Bisan giunsa ni Robredo og pasabot may mga botante gihapon sa Naga nga nihulagway niyang “boksidor” ug nangandoy og lider nga “karatesta.”
* * *
Matud ni Leni nag-antos sila sa mga pagsaway ug mga bugalbugal sa unang tulo ka tuig nga termino sa iyang bana. Apan sa kapulihay, tungod sa makanunayon nga pagpatin-aw ni Robredo sa iyang mga prinsipyo sa maayong panggobiyerno, nakasabot rang mga botante.
Nga dihang nidagan si Leni pagka kongresista gipadayon niya pagsagop ang lagda sa iyang bana. Nagpabungul-bungol lang siya sa padungug-dungog sa mga botante ug bisan sa iyang kaugalingon nga mga lider nga kinahanglan siyang manghatag og kuwarta. Nangagpas si Leni nga mahimong naaghat na lang pagtahod ang katawhan tungod sa ilang pagpasabot nga ang paggamit sa gamay’ng suholan sa gobiyerno alang sa ubang mga tawo, inay sa batakang panginahanglan sa pamilya, makapadugang gyud sa tentasyon sa pangurakot.
* * *
Ambot duna bay politiko dinhi sa Sugbo ug ubang bahin sa nasud nga sama sa mga Robredo di sab manghatag og regalo sa bunyag ug kasal. Kasagaran sa mga politiko dinhi sa ato, labi nang mga managan ug hapit nang piniliay, manghatag man gani og regalo bisan way klarong okasyon.
Nakahimong mas talagsaon sa kalampusan sa mga Robredo pagpahamtang sa ilang kaligdong kay gamhanan ug karaang politikanhong dinastiya ang ilang gipukan. Ug nga hingpit pa gyud nilang nabaraw ang tanang pagsuway sa mga Villafuerte pagbalik sa gahom.
* * *
Gipasabot sang Leni nga di sakripisyo ang iyang pag-bus gikan ug padung sa Manila ug Naga. Kay gawas nga naanad silang taga Luzon sa tag-as nga mga biyahe, haruhay sab ang buses--aircon, luag ang mga lingkoranan ug libre pang wifi. Wa sab siya’y angay’ng kabalak-an sa seguridad.
Nitataw si Leni nga di angay’ng mahibung ang katawhan sa ilang kayano. Kay igo lang nilang gipuy-an ang tinuod nilang kinabuhi. Nga posibleng usa sa labing dakong babag sa iyang pagpaundayon sa mga awhag pagpadagan niya og mas taas nga katungdanan sa 2016. Nakabantay hinuon ko og gamay’ng kausaban ni Leni--human hingpit nga gisalikway ang kahigayonan pagdagan pagka bise presidente sa niaging semana karon igo na lang nangandoy nga dunay laing mapilian.
- Latest
