EDITORYAL - Media killings

Duha ka mga sakop sa media ang naapil karon sa taas na kaayong listahan sa gipamatay nga mga tigbalita dinhi sa nasud. Silang duha gipatay sud lang ning semanaha.

Niadtong adlaw nga Lunes, usa ka publisher sa usa ka lokal nga pamantalaan didto sa Davao del Norte nga si Gregorio Ybañez ang gipatay, nagpadayon pa ang imbestigasyon sa kapolisan kun may kalambigitan ba kini sa iyang trabaho sa pagka-magsisibya o sa lain pa niyang trabaho.

Apan gitubag dayon kini og laing pagpatay sa usa ka tigbalita didto sa Sorsogon niadtong Martes sa gabii, ang anchorman sa dzMS nga si Teodoro “Tio Dodoy” Escanilla.

Ang Committee to Protect Journalist (CPJ) miingon, sagad sa hinungdan mao ang wa pag-irog sa mga kaso diha sa korte. Mahimong sa mga nag-imbestigar ang sayop o sa mga naglihok niini diha sa korte.

Ang CPJ Impunity Index nagtutok sa mga kaso sa mga pagpatay sa mga tigbalita diin ang mga kriminal pabiling gawasnon nagpakita nga gawas sa Iraq ug Syria ingon man sa Somalia, ikatulo ang Pilipinas sa dunay mas daghang mga kaso sa pagpatay sa mga tigbalita tungod sa ilang trabaho.

Nabutang ang Pilipinas sa maong listahan tungod sa kahanap sa kasigurohang makab-ot sa mga biktima ang hustisya, layo kaayo og kalainan kun ang biktima gikan sa inilang pamilya o politiko.

Ang maong pagpatay klarong paagi aron pahilumon ang mga tigbalita sa paghimo nila sa ilang trabaho. Nagpaabot usab kini og mensahe sa uban pang matinud-anong tigbalita aron sila bation og kahadlok.

Base sa talaan sa CPJ, duna pay kapin 50 ka mga gipatay nga mga tigbalita sa Pilipinas sa mga tuig 2004 - 2013 wala pa mahatagi og hustisya.

Nag-una niini ang 32 ka mediamen nga naapil sa Maguindanao Massacre niadtong tuig 2009.