Hugot ang seguridad

Hugot ang siguridad sa dakbayan sa Lapu-Lapu sugod karong adlawa hangtod sa tapos sa semana nunot sa dakong kalihukan nga himoon sa dakbayan.

Ang syudad sa Lapu-Lapu maoy magsilbing host sa ASEAN Defense Ministers Meeting sugod Oktubre 25 hangtod sa Oktubre 30. Ang mga defense ministers sa mga nasud nga naglangkob sa Association of Southeast Asian Nations (ASEAN) magtigom diha sa Lapu-Lapu aron hisgutan ang pagpalambo sa siguridad sa rehiyon ug uban pa nga mga importante nga isyu nga maglabot sa siguridad.

Isip kabahin sa pagsiguro sa kaluwasan sa mga delegado ang Lapu-Lapu mipahibawo nga ilang ipatuman ang revised truck ban schedule sugod karon. Ipatuman sab sa syudad ang asynchronous classes sa pipila ka mga tunghaan.

Way mga truck, van, hauler ang gitugotan nga makabiyahe sa mosunod nga mga dalan sa Lapu-Lapu sugod 6 a.m. hangtod sa 8 a.m. ug 5 p.m. hangtod 8 p.m.--- Maximo V. Patalinghug Avenue; Basak-Marigondon Road gikan sa junction sa Maximo V. Patalinghug Avenue paingon sa Marigondon Junction; M.L. Quezon National Highway sugod sa Marcelo Fernan Bridge; ug portion sa M.L. Quezon National Highway gikan sa Tacan sa Barangay Babag hangtod sa Lapu-Lapu City Central School.

Samtang ang mga tunghaan nga way face-to-face classes sugod karong adlawa hangtod sa petsa 26 naglakip sa mga public ug private schools sa Barangay Ibo, Buaya, Mactan ug Punta Engaño.

Apil niini ang Sto. Niño International School, EMD Carmelite School Foundation, Jose Alwins Learning School, B Cebu Dream Foundation Inc., Cebu International Language TVI Center, Global Leaders International School, Newtown School of Excellence, St. Joseph's School of Mactan, ug Sto. Niño Child Academy.

Lakip usab sa way face-to-face classes mao ang Lapu-Lapu City College, Lapu-Lapu Cebu International College, ug Sto. Niño Mactan College.

Ang kapolisan sa sayo pa mipahibawo sab nga kapin sa tres mil ka mga polis, sundawo ug uban pa nga naglangkob sa security personnel ang ilang gipakatap sa Lapu-Lapu sugod pa niadtong Biyernes aron masiguro ang kaluwasan sa tanang bisita.

Dili hinuon ni unang higayon nga ang Lapu-Lapu ug ang Sugbo mi host og susamang international event. Busa kampante ko nga way isyu sa siguridad nga mahitabo.

Ang akong nabalak-an og mobunok ang uwan atol sa maong kalihukan tungod kay way gipili ang baha ug uwaw alang sa mga bisita og mapugos sila pag-ubog sa tubig baha.