Ayaw na pagkumpiyansa

Usa sa mga kanhi hosts sa Buena Mano, pangbuntag nga programa sa GMA 7, gikawatan og mga mahalong gadgets sama sa i-Phone, smart phone ug tablet sulod sa serado’ng sakyanan nga iyang gi-parking duol sa usa ka fast food restaurant sa dakbayan sa Talisay niadtong Hulyo 19.

Segun sa asoy ni Cherryl ‘Ching’ Dacua Pelayo giparada nila ang ilang sakyanan kay nangaon sila kuyog sa iyang brother mga alas 11 sa buntag. Kumpiyansa kaayo siya nga mibilin sa iyang bag nga gisudlan sa iyang mga gadgets.

Human nila og pangaon, namalik sila sa nahimutangan sa ilang sakyanan. Gamit ang remote key, giablihan ni Ching ang nakaparada niya nga sakyanan nga sa tupad may nag-parking nga daku’ng van. Nakurat na lang si Ching diha nga namatikdan niya nga wala na didto sa iyang gibutangan sulod sa sakyanan ang iyang bag.

Ang makapahibulong kay wala’y forced entry o timailhan nga migamit ang kawatan og mga metal nga panglungag o pang-abli sa wind shield. Sa kabag-o sa sakyanan ni Ching, hitsas kini sa mga moderno nga sensor ug alarma kun may magbinuang sa iyang sakyanan.

Apan wa sila’y nadungog. Sa hitsura sa sakyanan sama ra nga wala’y tawo nga mitandog niini. Butang nga nakapalibog ni Ching kun giunsa pagkuha ang iyang bag didto sa sulod nga naka-lock man ang tanang pultahan niini? Nagpasabot ba kini nga ang mga kawatan, hi-tech na?

Aduna’y Closed Circuit Television (CCTV) camera ang maong lugar, apan pakyas ang gipangayo nga tabang ni Ching gikan sa tagdumala kay wala’y coverage nga ikapakita.

Hinuon, gipa-blotter ni Ching sa kapolisan ang maong hitabo ug iya na nga gipa-block sa National Telecommunications Commission (NTC) ang mao nga mga gadgets.