Pagpakalma sa stress (3)

Sa miagi'ng katapusan natong gihisgutan mao ang pagpakalma pinaagi sa pamalandong. Mora kini'g paghashas sa mga kahasol nga nagtipun-og nga kabalaka aron iandam ang kaisipan sa paglahutay. Bisan unsa kini kabug-at o makalibog, makasugakod gihapon kita sa kusog nga gipalig-on sa pamalandong.

Dugang pa ini, atong ipadayon ang uban pa'ng paagi sama sa mga mosunod;

* Sa pagkaon — Kinahanglan mokaon ka gayud sa pamahaw. Moinom ka una og tubig sa di pa mokaon. Iseguro nga ang pagkaon mo, makapahimsog usab sa utok ug sa panglawas mo. Igo na sa buntag mao'y kaonon ang itlog linung-ag, wholewheat toasted bread o sandwich nga may palama'ng peanut butter o tamatis pula, saging, gatas o sikwate (dark cocoa/tsokolate). Dayon  inom og herbal tea o tsa, nga human sa 30minutos anha pa moinom og tubig.

Sa ubang tingkaon mo, di magpalabi sa sebu o tambok o sa mga pinirito, subra'ng tam-is ug sa mga parat. Kaon permi'g isda,  bungahoy, lagutmon ug mga utanon. Panagsa-an ang manok o karne. Dili magpabusog ug dili sad magpagutom. Mokaon la'g ginagmay. Pwede  moinom og bino nga gamitoy lang (1 shot), dili kadaghan kausa lang sa adlaw, igo lang pabaskog sa kaugatan. Apan kun palabian gani makayabag na ni sa maayo'ng panghunahuna.

*Igo nga katulog — Dili mamuwaw kinahanglan makapahuway ang lawas ug panghunahuna. Kun hamtong ka, igo na ang 5-6 ka oras basta nahinanok ug 1ka oras magpiyong samtang molingkod nga nakasandig, para makarelaks o makapahuway ang mga mata ug ang panghunahuna mo. Kun kini'ng tanan mahimo mo, obserbahe di ba permi ka na mapahiyumon.