Hadlok mopahiyum

Nag-edad pa lang siya’g 10 anyos, determinado na si Tess Christian nga taga UK, nga dili mopahiyom kay hadlok mangunot o matiguwang ang nawong.

Sa iyang dagway nga gihulad sa Allure magazine, makita nato ang kahamis sa iyang nawong. Matud niya, sud sa 40 ka tuig, nakat-on siya pagkontrol sa kaugatan niya nga dili mopahiyom.

Kini’ng pangagpas niya, natinuod man sab.

Daghan ang dili makatuo niini tungod kay lisud g’yud ang paghimo nga di ka mopahiyom sa kinabuhi. Ang pahiyom maoy usa lang sa reaksyon sa atong pagbati nga makita sa dagway ang kamaya o kalipay. Dili lang ang pahiyom makapatiguwang, hasta usab ang bation nga kasakit, mokunot ang agtang.

Mga negatibo’ng reaksyon sama sa pagmug-ot, yamiid, samot makapakunot.

Bisan pa man adunay mga eksperto nga midason nini’ng pahiyom nga makapakunot o makapatiguwang, apan mas bentaha ang mga benepisyo nga makuha nato sa pahiyum. Pagpadayag kini sa kahimuot o kadasig sa atong pakiglambigit sa isigkatawo. Kun di ta mopahiyom masaypan kita’ng di maayo ang atong pagkatawo, nga maglisud makaangkon og kabulahanan sa kinabuhi. Ang tinuod lang, dili ta angay mahadlok sa pagpahiyom. Pagpadayag kini nga di angay pugngan. Mahimo’ng wa ta’y kunot sa nawong apan ang lawas ug panghunahuna maapektahan sa stress o kakapoy sa pagpakaaron-ingnon nga nagpugong sa kaugalingon nga di g’yud mopadayag sa tinuoray nga kahimuot.

Apan ayaw kabalaka nga mopahiyom kay duna kini sekreto nga maalkontra ang pagpangunot. Nga mas mahimo ka pa gani’ng batan-on nga sud-ongon.

Pino nga pahiyom lang, nga dili ikiat palihokon ang agtang, mata, aping nga kontrolahon nga inanay iinat ang apapangig. Praktisa atubangan sa salamin aron ka maanad.