Konsultasyon ug pamalandong
Sa wa pa moulbo ang lapad nga lalis sa lahi niyang liderato, nipalili na si Pope Francis sa iyang paagi sa pagduma sa 1.5 ka bilyon ka Katoliko sa tibuok kalibotan. Sa iyang pakighinabi ni Antonio Spadaro, S.J., editor in chief sa La Civiltà Cattolica, usa ka Italiyanong pamantalaang Jesuit, gibutyag sa Santo Papa ang duha ka mahinungdanong haligi sa iyang pagpangu sa labing karaang relihiyusong institusyon:
Pagbatyag ug pagpaniid sa katawhan ug mga panghitabo sa palibot; ug
Matinud-anon nga pagkonsulta di lang sa kadagkoan sa simbahan kon dili ug labi na gyud sa katawhan sa sud ug sa gawas sa simbahan.
* * *
Niangkon si Pope Francis nga nagsugod nang mga pagsaway sa iyang kanunay nga pagpangonsulta sa di pa mohimo og bisan unsang desisyon. Bisan ang iyang labing suod nga kaparian ug mga layko nitataw sa kadinalian sa panginahanglan pagpasiugda og dagkong kausaban sa simbahan.
Sila’y niawhag niya sa paghimo og desisyon sa way pagpaabot kanus-a magkauyon ang iyang mga magtatambag. Nipasabot si Pope Francis nga kasagaran sayop ang mga desisyon nga gipasikad sa unsay labing unang mosantop sa hunahuna. Napamatud-an ni sa pait niyang kasinatian isip 36 anyos nga Provincial Superior sa Jesuits sa tibuok Argentina. Ang pag-umol niya og mga desisyon nga way konsultasyon nakapasamot sa pagkatibuwaag sa kaparian.
* * *
Di hinuon motugot si Pope Francis nga magpadayon ang naandan nga paagi sa konsultasyon sa Vatican. Gusto niya nga paluagan ang higpit nga mga lagda sa burukrasya aron nga mahimong mas gawasnon ang binayloay sa mga panghunahuna. Nasaksihan ang pasiunang mga timaan sa mas matinud-anong konsultasyon atol sa Third Extraordinary General Assembly sa Synod of Bishops sa niaging tuig.
Bag-ong paagi sa konsultasyon mao ang pagpaminaw sa mga kardinal nga way labot sa inadlaw’ng pagduma sa Vatican. Palambuon ni sa Santo Papa kay usa sa nauyonan sa conclave dihang kalit nga nibiya sa katungdanan si kanhi Santo Papa Benedict XVI.
* * *
Laing gipasikaran sa pasiunang kausaban nga iyang gipatuman mao ang hugot nga pamalandong pinaagi sa pangaliya ug pagpaniid sa palibot. Matud ni Pope Francis mao ni gipasikaran sa iyang pag-insistir paggamit og yano nga mga sakyanan ug pagpuyo uban sa kaparian sa Casa Santa Marta, inay nga mag-inusara sa Apostolic Palace nga maoy tradisyonal nga pinuy-anan sa mga Santo Papa. Gipasabot ni Pope Francis nga di luho ang Papal apartments nga wa na niya gamita.
Gani, karaan na, hamugaway apan di harianon. Ang wa niya ganahi mao nga samtang dako kaayo ang luna sa sud morang imbudo kay gamay kaayo ang ganghaan, nga pipila ray makasud sa usa ka higayon. Matud ni Pope Francis di siya makapangu sa simbahan nga buwag gikan sa kadaghanan.
* * *
- Latest
