Sirkus sa City Hall

Morag dili maayo ang pagsulod sa Bag-ong Tuig alang sa kagamhanan sa dakbayan sa Sugbo. Kini tungod kay padayon gihapon ang gubot tali sa ehekutibo ug sa lehislatibo sa mga kalihokan diha sa atong Balay Lungsod.

Sa niaging mga semana, gi-veto ni Mayor Michael Rama ang giaprobahang ordinansa sa City Council nga naggahin og 10 ka ektarya diha sa South Road Properties alang sa tukoron nga sports hub sa dakbayan.

Matud pa ni Rama, wala kunoy gahum ang konseho pag-decide sa paggahin sa maong luna ug sa gidak-on niini. Ang executive department kuno maoy dunay katungod niini, matud pa sa mayor ngadto sa mga mamahayag human sa iyang pag-veto sa maong ordinansa.

Apan giklaro ni Rama nga wala siyay supak pag-implementar sa maong proyekto sa sports hub. Gidak-an kuno ang mayor sa 10 hektaryas nga lakang sa konseho. Alang kaniya insakto lamang ang tulo ka hektarya nga gahin alang sa sports hub diha sa SRP.

Mao nang dali lamang nga naka-veto ang mayor sa maong ordinansa. Hinuon wala pay migawas sa media nga reaksiyon sa konseho, kansang mayoridad mga kaalyado sa kanhi mayor nga si Tomas Osmeña, ang political rival ni Rama karon.

Apan siguradong moribenta na usab ang konseho niini. Gani, adunay mga higayon nga gi-override sa mga sakop niini ang veto sa mayor. Ug akong nakita nga mao usab ang ilang buhaton niining maong ordinansa.  Ug niining maong kalamboan, makaingon kita nga nagkainit na gayud ang sirkus diha sa City Hall. Lisod na kini nga molurang pa. Ilabina nga hapit na usab ang sunod nga eleksiyon diin dakong posible nga magharong na usab si Rama ug Osmeña.

Bisan pa man sa iyang unang termino, wala na gayuy maayong relasyon si Rama ug ang konseho nga gidominar sa Bando Osmeña Pundok Kauswagan. Matag lakang sa mayor pagdughit og mga proyekto, tulin pa sa eroplano nga makababag ang konseho.

Tungod kay walay usa sa duha ka habig ang magpiri, wala gayuy magdaug kanila. Apan klarong napagan niining ilang gubot ang katawhan niining dakbayan nga mao unta ang una nila nga giserbisyohan.

Hinuon kabahin sa himsog nga demokrasya ang kagubot tali sa duha ka sanga sa lokal nga pangagamhanan ning siyudad. Apan kun magpirmanente kini, dili na usab maayo tungod kay wala gyuy kalamboan nga mapaabot.