Pakigbatok sa paglaum

Dugay na nga wala ko’y kasayuran ni Romeo (di tinuod nga ngalan) apan nagpabiling lab-as sa akong panumdoman ang iyang mahinuklogon nga kasinatian sa kinabuhi. Nga angay usab natong himuong panig-ingnan aron ikapamahin kini, ilabi na alang niadtong gusto napagngan ang paglaom niya.

Usa siya ka dayo nga gikan sa Bantayan isla sa Cebu. Bayongbayong nga wa gyud makaila unsay grado o eskuwela. Nagdako siya sa ka aserasan.Apan may kinaiya siya nga mahadlokon sa pagbuhat og dili maayo.  Mao kanunay maghapdos ang tiyan niya sa kagutom, apan malaumon siya sa kinabuhi.

Hangtud nasigpatan niya ang babayeng katalirongan niya’g edad, nga kanunay nga kakuyog sa ginikanan niini nga manguhaanay og lamaw sa mga kan-anan o mga restawran. Niadtong higayona si Romeo maghugasan sa kampo sa sundalo diha sa Fort San Pedro, Plasa Independencia, aron kakaon.

Siya say tighatag sa subrang pagkaon o mga lamaw ngadto sa ginikanan sa babayeng iyang nahimong kaipon. Katabang na siya sa pagrasyon sa mga lamaw sa mga adunay binuhing kahayopan. Simple kaayo ang tinubdan sa ilang panginabuhi. Dihang may anak na si Romeo, labing nagmaisogon siya sa diskarte aron mabuhi sila uban ang ilang anak. Apan sungog sa pagsulay, namatay ang iyang asawa nga nabinlan og tulo ka mga anak. Apan bisan hapit siya mayabag sa kaguol, wa siya mobuhi sa pakigbatok sa paglaom.

Sa ulahing panagkita namo, tua na sa abrod ang mga anak niya nga pulos graduwado, dihang gisuwerte siya sa negosyo isip tighakot sa mga lamaw o mga biyang pagkaon gikan sa mga dagkong kan-anan o restawran.