EDITORYAL – Proteksyon sa Kabataan

Dunay usa ka video nga nakuha gikan sa Manila Bay nga nag-viral sa internet. Kini nagpakita sa paglatos sa usa ka amahan sa iyang anak nga babaye  samtang nagtan-aw ang mga tawo sa iyang gibuhat.

Makita sa video nga grabe ang kalisang sa dalagita ug nagpakiluoy kini sa iyang papa apan gipusposan siya og maayo og kahoy ug gitusmod pa ang nawong niini diha sa dagat.

Unsa ba kahay sala sa bata nganong ingon niadto kasuko ang iyang amahan?

Dinhi sa Sugbo, duna say nangasakpang mga ginikanan nga mi-exploit sa ilang mga anak ug gigamit sila sa ilang pangwarta pinaagi sa cyber sex ug child pornography.

Gawas pa niini, ang kabataan bantang kaayo sa pagpangabuso sa gawas, sa ilang mga higala ug bisan na sa mga kamot sa ilang mga magtutudlo diha sa eskuylahan.

Ang Pilipinas adunay RA 7610 kon Protection Against Child Abuse, Exploitation and Discrimination, Anti-Child Pornography Act of 2009, ug Anti-trafficking in Persons Act of 2003.

Ang United Nations mi-adopt sa UN Convention on the Rights of the Child (CRC) kaniadto hinungdan nga ang mga signatory countries nipanday og ilang mga balaod.

Apan sumala pa sa UNICEF-Philippines, bisan duna nay mga kausaban sa tratamento sa kabataan, taas pa kaayo ang latason tungod kay daghan pa gihapong mga bata ang pabiling giabuso.

Karong bulana gisaulog  ang National Children’s Month nga ang tumong mao ang paghingusog sa kampanya aron protihian ang kabataan gikan sa eksploytasyon ug pagpangabuso.

Kinahanglan silang bistihan, pakan-on, paeskuylahon, suportahan ug panalipdan gikan sa pagpasipala sa uban.