Ang pagkaon dili tambal

Adunay panagbangi sa mga opinyon, mahitungod sa pagkaon nga kuno kini usa ka tradisyonal o orihinal nga tambal sa tanang mga sakit. Medyo may katinuoran kay niadtong karaang panahon, gihisgutan na man sa Bibliya nga ang tanom o ang bunga niini gihimong pagkaon, aron dili masakit. Duna gani klase sa tanom nga herbal, gihimong pang-alibyo sa dili maayong gipamati sa lawas.

Gani kadtong miinsister nga ang pagkaon usa usab ka tambal kay daghan man kuno ang masakitong nangaayo pinaagi niini. Mao nga sa pagkakaron, daghan na kaayong produkto isip suplemento nga pagkaon. Ila gyud nga gihanyag nga kini tambal sa tanang sakit.Tinuod tingali kay duna man say daghang mitestimoniya niini nga ang maong pagkaon nakaayo sa ilang mga sakit.

Tungod niini, ang atong ahensiya sa gobiyerno nabalaka pag-ayo kay mao na may pagtuo sa kadaghanan nga kining matang sa pagkaon nga gikapsula, gipulbos o gitabletas, gipamutangan kini sa FDA og pahimangno o marka nga “No therapeutic claim” nga kun sabton dili kini tambal. Kay nangahunong na man gud ang mga negosyante nga nagprodyus aning mga “food supplements”.

Di sad nato sila mabasol kun kini man maoy nasilsil sa ilang pagtuo kay neepekto man sad kini sa ilang kaugalingon. Lamang wala sila ayoha sa pagpasabot nganong naingon niana, nga ang uban gani wala man mosalir kay nagsalig lagi nga tambal kini. Busa angay kita magmatngon ug susihon gyud pag-ayo kun unsa kini ka-epektibo o kaha ang kalidad sa food supplements.

Sa atong nasigpatang kasayuran gikan sa pagtuon sa mga eksperto aning bahina, ang pagkaon ug ang tambal, managlahi ang iyang kagamitan apan pulos gikinahanglan sa panglawas. Kay ang pagkaon nga kompleto sa nutreyens, lig-onon ang immune system sa lawas aron malisud dutlan sa sakit. Sa ato pa, makapahimsog sa panglawas ang pagkaon.

Busa moduol ka sa doctor aron magpatambal. Kay nagkasakit ka sa subra sa pagkaon. Ayaw pagpabusog, igo na kaonon ang kompletong nutreyens. Ang pagkaon dili pag-ayo sa sakit kun di himuong himsog ang lawas nga mailikay sa mga sakit. Ang pag-ayo sa sakit, hatagan ka’g tambal ug dili na ang pagkaon.