Ang CITOM ug ang kasaba sa kadalanan

Ambut ngano nga helpless man ang atong gobyerno pagsanta sa kasaba sa kadalanan, mugna sa mga motorcyclists nga mituyo pagtangtang sa muffler sa ilang mga motorsiklo aron pagpasikat, nga ma-mora sila’g hawod ug maayong laki nga mag-motor.

Ambut ngano nga gipasagdan lang ni sila sa gobyerno. Kahinumdom ko nga years back,  didto sa Cagayan de Oro, sa nag-eskwela pa ko sa Xavier University – Ateneo de Cagayan, gidakop mi, uban sa akong classmate, gumikan sa kasaba sa motorcycle nga among gisakyan. Di gyud kaayo saba, sama sa kasaba sa ato karong mga motorsiklo … apan, gipamulta mi on the spot.

That was in the 60s. Dugay na no? Niadtong panahona, gamay ra ming dunay motorsiklo, sa ato pa, sikat kaayo. Ulitawo ug nag-eskwela pa, unya duna nay motorsiklo. Lami kaayong ipasikat.  Duna ko’y kwarta kay working student man ko.

Anyway, something should be done about this. Usa ka concerned citizen,  nangutana, “what are our officials doing to discipline the thousands of motorcycles raging our streets. Riders deliberately remove their mufflers. Why?”

Bitaw, why man? Makatubag ba kaha ang CITOM ug ang LTO ini nga ila man unta ning lookout ug katungdanan? Wa na man gani silay nahimo pagpasul-ob sa gi-require nga mga helmet.

Mipadayon ang concerned citizen: “There are enough laws to force them to re-install the mufflers: the anti-noise pollution law and Land Transportation Office regulations requiring mufflers on all vehicles.” So, there you are: LTO? CITOM?

* * *

Niay istorya akong nasindolan: Usa ka higayon, sa usa ka dakung mall outside Cebu City, daghan kaayo ang nagpila, naghuwat sa ilang turno pagbayad, when all of a sudden usa ka rich-looking nga babaye mikalit og “overtake” sa nagpila, midiritso sa counter, buot nga siyay unahon pag-atiman.

Mibalibad intawon ang cashier, mihangyo nga molinya, kay maikog siya sa nagpila. Na-slighted ang socialite, ug misingka: “ Waa ka kaila nako?”  Waa katingog ang cashier, ug ang nagpila nay mitubag: “Kaila man mi nimo … Unya …?” Nauwaw ang babaye, mi-withdraw. Waa na ko kapangutana kun miapil ba siya’g pila. Tinuod ba kaha tong hitaboa no?   Anyway, ato ning gihisgutan dinhi tungod kay duna nay balaudnon nga gipasaka sa Kongreso nga magsilot niining mga matang sa pamintaha ug pag-abuso, mosapaw sa pila kay gustong makauna. Sa Tagalog, ginganlan kini og pasaway.

Busa, ang balaudnon giulohan og Anti-pasaway Act of 2014. Kun mahimo na kining balaud, ang babaye nga atong gihisgutan dinhi, kasilotan na. Matud dinhi: “Jumping the queue may soon be illegal and the pasaway or those who cut into a line so they could go ahead of others, may face prison terms or fines.”

Ambut, pagkabadlongon baya gyud natong mga Pinoy. Bisan sa pagpangalawat, mag-inilogay ta, maglumba, gustong maoy makauna. Ngano man, hadlok tang mahutdan sa hostias?