Bag-ong liderato

Sugod karong udtong tutok, Hunyo 30, molingkod na ang bag-ong mga napili nga mga opisyal sa nagkadaiyang local government unit lukop nasud.

Sa mosunod nga tulo ka tuig sila maoy magdumala sa renda sa pangagamhanan sa ilang tagsa-tagsa ka mga lungsod, syudad ug lalawigan.

Mubo ra ang tulo ka tuig alang sa mga maayong lider, kadtong mga opisyal nga tinud-anay nga nagmahal ug nagpangga sa katawhan. Apan labihang taasa niini nga antuson sa publiko kun sila nasayop sa ilang pagpili niadtong miaging piniliay. Sa tanang mga magsugod sa ilang pagpangalagad karong adlawa, hinaot nga inyong hinumduman ang tanang saad panahon ssa kampanya.

Hinaot inyong ampingan ang mandato sa katawhan ug kanunay’ng hinumduman nga ang gahom lumalabay apan ang lunsay ug tiunay nga pagpangalagad magbilin ug malungtaron nga tunob diha sa kasaysayan nga bisan kanus-a dili mahimong mapapas ni bisan kinsa.

Ang maayong legasiya sa usa ka lider mahinumduman hangtud sa hangtud ug bisan na sa mosunod nga kaliwatan.

* * *

Dinhi sa dakbayan sa Sugbo, daghan ang nagtuo nga misugod na og si-ak ang maayong relasyon tali nilang Mayor Nestor Archival ug Vice Mayor Tomas Osmeña. Kini tungod sa kontrobersiyal nga pagpalabang sa konseho sa dakbayan sa zoning ordinance bisan sa hugot nga pagsupak sa mga sakop sa urban poor labi pa sa mga vendors sa Carbon Market.

Ang mga sakop sa urban poor nga gipangulohan ni Bimbo Fernandez, kinsa kaalyado pud sa BOPK ug sakop gyud gani sa transition team ni Archival, mipasangil sa bag-ong mayor nga mibudhi kanila tungod sa iyang kapakyas pagbabag sa pagpalabang sa ordinansa.

Ang pasangil sa pagbudhi gidasunan ni Osmeña hinungdan nga daghan ang nagtuo nga nagsugod na ang away sa duha ka mga lider sa BOPK bisan wala pa sila hingpit nakalingkod sa pwesto.

Tinuod nagkabangi ang baruganan sa duha ka mga lider sa BOPK sa maong isyu. Apan sayo pa aron hukman nga ang away nagsugod na. Normal ang panagbangi sa baruganan apan wala ni magpasabot nga dunay away nga mahitabo.

Pruweba nga nagpabiling maayo ang relasyon nilang Archival ug Osmeña mao ang ilang panag-abot atol sa oath-taking ni konsehal Pablo Labra II niadtong Sabado.

Nasaksihan sa mga dumadapig sa BOPK ang panag-istoryahay sa duha ka mga lider ug sa maayo nilang pagtinagdanay sa usa’g usa.