Usbaw ug luok sa suholan

Managlahi ang panglantaw sa kadagkoan sa gobiyerno sa Pilipinas ug Japan: Aron pagpalambo sa naluya nilang ekonomiya, ang gobiyerno sa Japan nagpasiugda og hiningusgang kampanya sa pagpausbaw sa suholan; samtang ang gobiyerno sa Pilipinas determinado nga nilansang sa suholan. Karon nakalili na ta sa usa sa posible nga mga hinungdan nganong mas malambuon ang Japan.

Si Primero Ministro Shinzo Abe sa Japan kusganong niawhag sa tanang mga kompaniya sa pagpausbaw sa suholan sa ilang mga trabahante. Sa iyang bahin, si Presidente Noynoy Aquino hingpit nga napaundayon sa binuang sa gisundan niyang mga pamunoan pagtugyan sa suholan ngadto sa wage boards nga gidominahan sa mga negosyante ug mga opisyal sa gobiyerno.

* * *

Kumbinsido si Abe nga ang mas dakong suholan sa mga trabahante mosangpot sa mas dakong konsumo. Kay ang mga trabahante nga maoy mayoriya sa mga Hapones makaangkon man og dugang kuwarta pagpamalit sa inadlaw nila nga mga panginahanglan. Nabalaka si Abe nga ang paglansang sa suholan makapahinay sa paglambo sa nasudnong ekonomiya.

Mas kuwestiyonable ang buta nga pagdason nilang Aquino ug sa iyang mga magtatambag sa kahakog sa mga negosyante. Kinsa niinsistir nga ang paglansang lang sa suholan maoy makapalambo sa ilang patigayon ug makadugang sa ilang katakos pakigkumpetinsiya sa karibal nila nga mga negosyo sa ubang kanasuran sa Asya ug sa kalibutan.

*  * *

Natingob ang atensiyon nilang Aquino ug sa iyang pinalabi nga mga negosyo sa tumoy sa ilang ilong. Maong napakyas sa pagkakita sa mas dakong hulagway nga nakit-an nilang Abe ug ubang mga tigpasiugda sa “Abenomics” sa Japan.

Ambot nganong wa gyu’y nakahunghong ni Aquino nga ang mas dakong suholan sa mga mamumuo di nila katagoan sa kaban ni ikalubong sa yuta. Bisan unsa nga madugang sa take home pay sa mga anak sa singot ikapamalit gyud sa ilang mga panginahanglan. Di mahitabo ang gikahadlokan sa mga negosyante nga pagluya sa ilang mga negosyo. Sila ang labing makapahimus sa mas taas nga demanda sa ilang mga produkto ug serbisyo.

* * *

Ang mas dakong halin sa mga negosyante di makapasera sa ilang mga negosyo. Hinunoa, makahatag nila og katakos sa pagpalapad pa sa ilang operasyon ug pagpanguha og dugang pang mga kawani. Nga hinaot makahatag pa gyud nila og laing sukaranan sa paghatag og dugang nga usbaw sa suholan.

Ang kahiktin sa panglantaw ug kahakog og kuwarta sa mga negosyante nakahikaw nila sa kahigayonan pagkaplag sa mas makahuloganon nga kamatuoran--ang dugang kuwarta nga ilang ibutang sa mga bulsa sa ilang mga mamumuo maoy labing laktod nga paagi sa pagkab-ot sa mas makiangayon ug mas malungtaron nga paglambo sa ekonomiya. Nga di na siyam-siyaman og atang ang labing kabos sa katawhan kanus-a makaabot nila ang dagayday sa kalamboan.

[email protected]