Pagluha at dasal

Maysakit ang aking mutyang nililiyag

Kaya ang puso ko’y lubhang naghihirap;

Pati ang diwa ko’y hindi makalipad

Doon sa parnaso ng mga pangarap!

Puso n’ya’t puso ko noo’y pinag-isa

Sa lumang simbahan ng bayan kong sinta;

Siya’y inspirasyong kadluan ng saya

Sa maraming pook na aming nakita!

Habang umuusad lakad ng panahon

Sakit ng puso n’ya umuulit ngayon;

Ang sabi ng doktor dapat operasyon

Di kami pumayag di niya kaya ‘yun!

Salamat sa aking anak na panganay

At tatlo pang bunso na nakaalalay;

Ang buhay ni Mahal ay nadurugtungan

Tanging ayuda ko’y pagluha at dasal!