EDITORYAL - Unsa kahay mga pagsulay ning tuiga

Matag abot  sa bag-ong  tuig, igo ra gyud  ta  sa pagpangandoy  nga  unta  ihatag  ang  kalinaw  sa atong  palibot  sa tibuok  tuig.

Apan  sa miaging tuig 2013, giayag  ang  nasud  sa mga  mugna sa tawo  nga  suliran  ug  mugna  sa kinaiyahan  nga  katalagman.

Sa miaging  tuig,  ang  gubat  sa Zamboanga,  usa ka  mugna  sa  tawo  nga  kagubot ,  ingon  man  ang  nadiskobre  nga P10 bilyones  nga  pork  fund  scam  nga  anomaliya.

Ang  mga  mugna  sa kinaiyahan  nga  katalagman  mao  ang  linog  nga  7.2 magnitude ug bagyong  Yolanda.

Sa pagsugat  baya  nato  sa bag-ong  tuig niadtong  2013, malinawon  kaayo  ang  palibot  ug  way  nagdahum  nga  hamukon  ang  nasud  sa nagkadaiya  nga  katalagman.

Sama  gihapon sa pagsugat  nato  sa tuig 2014,  diin  puno  kaayo  sa kalipay  ang  tanan  gawas  lamang  sa nabuthan  sa pabuto   sa kadalanan  ug  sa ilang  balay.

Kitang  tanan  wala  masayud  unsay  moabot  nga  pagsulay  kanato  samtang  magpadayon  sa pagdagan  ang  mga  buwan  niining  tuiga.

Ang  matag  usa  pulos  na  suhito  kaayo bahin  sa kinsay angay  ampoan  sa panahon  nga moabot  ang  makalilisang  nga  hampak sa  kahigayonan.