EDITORYAL - Sen. Jinggoy Estrada gipriso kuno sa US

Pastilang  dimalasa  ni  Sen. Jinggoy kay gipasinginlan  mang  napriso  kuno  didto  sa US  dihang  nasakpan  nga  nagda  og  dakong  bulto  sa salapi  nga  buhis  sa mga  Filipino.

Ambot  kun  unsa  ka tinuod  nga  gisipitan  man  kuno  sa senador  ang  binandol  nga kuwarta  unya  nadiskitahan  man sa  mga   otoridad.

Paita  mikagulkol  kuno  ang  senador    sa prisohang  Amerikanhon.

Hinuon  dali  kaayo  kining  gipanghimakak  sa  senador kinsa  miingon  nga  usa ka  tumo-tumo nga balita  ang gimugma  sa  Facebook  bahin  kaniya.

Puwerting  kisikisi  ni  Estrada  kay  di  lagi  tinuod  nga  napriso  siya ug  usa  ka  bugal-bugal ang maong  balita.

Ang  mga  tawo  gud  nga  naglagot  na,  dali  kaayong  manungo  sa  tinguha  nga  kapahamtangan  gyud og  silot  ang  mga  opisyal  sa goberno  nga  kiriwan  sa kuwarta  ug  buhis  sa katawhan.

Unsaon  man  paglambo  sa nasud  kun matag  karon  ug  unya  unayon  ra  sa iyang mga  opisyal  ang  pagkawkaw  sa  pundo  niini.

Si Sen. Jinggoy  ambot  kun  tinuod  tong nakabulsa  kuno  og  dul-ang P200 milyones   gikan  sa giingong  PDAF money  nga  kunohay  igasto  sa proyekto  nga  gigama  sa mini  nga  NGO  ni  Janet Lim  Napoles,  daghanang  kuwartaha  no.