EDITORYAL - Ang pagbiya sa abogada ni Napoles

Hinuon daghan  siya  og  abogado apan sa  kadako  sa iyang  kaso  murag  maglisud  kini  paglusot  aron  pagaanan  ang  silot.

Si Atty  Lorna Kapunan wa  pa makapasabot  sa iyang  bahin  nganong  mibiya siya  pag-abogar  kang Janet Lim Napoles ang  utok  sa P10 bilyones  nga  pork barrel  scam.

Tungod  ba  sa kadaghang  abogado,  may  higayon  pa kaha  nga  masalbar  si  Napoles  gikan  sa  bug-at  nga  silot  sa iyang  mga  sala.

Mahimong  makalusot  siya  tungod  sa iyang  mga  abogado, apan  ang  minilyon  ka  Filipino  nga  nasayud  sa kamatuoran  giunsa  niya  pagkiriw  ang  binilyon  ka pesos  nga  buhis,  magpabilin  kining modumot  kaniya.

Kaanugon  sa maong  kuwarta  nga  alang  man  unta  kini  sa mga proyekto  sa nasud  nga  makatabang  kaayo  sa  mga  kabus.

Ang   mga  Filipino  bun-og  na  kaayo  sa  mga  pagbugal-bugal  sa mga  kawatang  opisyal  ug  di  opisyal  sa goberno.

Ngano  ba  usab  nga  nahimo na man  kining  dugo  sa mga opisyal  sa kagamhanan  nga  diskontento  sa ilang  pagkabutang  kun  di  makapanghilabot  sa kuwarta  nga  di ila.

Kuwartahan  na  sila, apan    matag  karon  ug  unya  makahunahuna  man  sila  sa pagpangawat  sa  kuwarta  nga  iya  sa gobiyerno.

Tungod  ba kaha  kay  gituyo  usab  nga  haguka  kaayo  ang  seguridad  sa panudlanan  sa kagamhanan  aron  ipakawat  sa  mga  kawatang  opisyal?