Empleyado nga mag-awol unsay silot?

Ang usa ka empleyado adunay katungod nga mo-absent sa trabaho apan kinahanglan nga adunay pormal nga notisya sa iyang employer kun siya di makatungha tungod sa mga balido nga rason. Apan unsa bay silot basi sa balaod kun ang usa ka kawani mo-absent nga di mananghid sa iyang kompaniya nga gitrabahoan? Kana nga pangutana ang atong tubagon karon sa atong column.

Dear Atty. Divine,

Niadtong miaging buwan nagkasakit ko ug gitambagan ko sa doctor nga mopahuway una og usa ka semana sa akong trabaho. Tungod niini, akong gipahibawo ang akong supervisor nga mo-leave ko og one week pinaagi sa text apan wa niya mapahibawo ang among HR Department hinungdan nga gikonsiderar ko nga AWOL. Tungod niini, ila kong gipadad-an og memorandum to explain in writing nganong dili ko pahamtangan og silot sa akong pag- AWOL sa trabaho. Unsa may maayo nako nga buhaton? Dili ba diay makonsiderar nga notice sa akong employer ang akong pagpahibawo sa akong supervisor pinaagi sa text nga mo-absent ko sud sa usa ka semana tungod sa akong problema sa panglawas? — Nida

Dear Nida,

Isip usa ka empleyado kinahanglan sab gyud nga responsable ta pinaagi sa pormal nga pagpahibawo sa atong employer kun kita dili makatungha sa trabaho tungod sa mga balido nga rason. Sa imo nga kaso, valid ang imong pag-absent tungod sa tambag sa doctor apan mas maayo gyud unta nga mi-file ka og sick leave nga diin  imo sab nga patabanan sa kopya sa rekomendasyon sa doctor aron sab makapangandam ang imong employer pagpangita og temporaryong mohulip sa imong mga gimbuhaton nga mabiyaan. Gumikan sa imong kapakyas pagpahibawo sa HR Dept. natural lang nga maabtan gyud ka og memorandum. Ang maayo nimo nga buhaton karon mao ang pagtubag sa maong memorandum pinaagi sa pagpasabot sa imo nga side. Mas maayo sab nga mangayo ka og medical certificate gikan sa imong doctor aron imong isukip sa imong tubag. Mamahimo sab ka nga magpatabang sa imong Supervisor sa pag-explain sa imong HR nga ikaw nakapahibawo kaniya pinaagi sa text. Kinahanglan nga imo gyung palig-onon  ang imong tubag kay basi sa Article 282 of the Labor Code of the Philippines, “An employer may terminate an employment for any of the following causes: x x x (b) Gross and habitual neglect by the employee of his duties; x x x”. Sa ato pa, kondili nimo sila mapasabot pag-ayo sa imong  pag-absent  nga way pananghid then mamahimo ka nilang taktakon sa trabaho tungod sa imong pag AWOL. Hinaut nga akong natubag ang imong pangutana. Daghang Salamat and God Bless. — Atty. Divine

* * *

 Alang sa imong mga pangutana, ipadala lang sa Legal Corner sa Banat News sa V. Gullas Street, Cebu City or email sa flores_ [email protected]. ug akong tubagon ang inyong pangutana matag adlaw’ng Miyerkules ug Domingo pinaagi sa akong column.