Collector nga gibayran “on commission basis” makonsiderar bang regular nga kawani? Taliwala

Taliwala sa kalisud nga atong nasinati karon, daghan sa atong mga kaigsuonan nga mosulod na lang sa bisan unsa nga matang sa trabaho aron sila mo income. Apan inay kaluy-an sa kompaniya ang ilang empleyado nga nag-alagad kanila pinaagi sa paghatag sa mga benepisyo, ang ubang employer mohikaw man hinuon niini ug ilang ikonsiderar ang empleyado nga independent contractor  busa dili kini entitled sa mga benepisyo. Apan unsa bay basihan pagsuta kun aduna bay employer-employee relationship nga nag exist tali sa empleyado ug sa kompaniya nga iyang gitrabahu-an? Kana nga pangutana ang atong tubagon karon.

Dear Atty. Divine,

Nagtrabaho ako sa usa ka kompaniya isip usa ka collector. Duha nako ka tuig nga nagtrabaho sa among kompaniya apan hangtud karon wa pa man gihapon koy mga benefits sama sa SSS, PAGIBIG ug Philhealth, overtime pay ug uban pa. Sa dihang akong gipangutana ang HR Department sa maong kompaniya iya kung giingnan nga dili kono entitled sa maong benefits kaming mga collectors kay dili kono kami mga regular nga empleyado kondili mga ahente lang. Ang among madawat nga sweldo gibasi sa among collection apan ila ming gihatagan og quota matag buwan. Busa ang akong pangutana attorney kun dili ba diay kami makonsiderar nga empleyado nga full time man kami nga collector sa maong kompaniya? Hinaut nga imo ming mapasabot kun unsa gyuy among employment status. Daghang salamat and more power to your column.— Ernesto

Dear Ernesto,

Aduna nay daghang desisyon nga giluwatan ang Korte Suprema kun unsaon pagsuta kun aduna bay employer-employee relationship tali sa usa ka kawani ug kompaniya nga iyang gitrabaho-an. Ang mga elemento nga tan-awon kun makonsiderar ba nga empleyado sa usa ka kompaniya ang usa ka kawani mao kining mosunod: “(1) the selection and engagement of the employee; (2) the payment of wages; (3) the power of dismissal; and (4) the power to control the employee’s conduct.” Ang ikaupat nga elemento nga mao ang control test maoy labing importante sa tanan nga diin kun ang usa ka kompaniya adunay control kun unsaon sa usa ka kawani pag-perform ang iyang trabaho ug sa unsa nga mga paagi niya buhaton then makonsiderar unya kana nga adunay employer-employee relationship nga nag exist. Hinuon aduna say desisyon ang Korte Suprema nga nagkanayon: “ the Court held that collecting agents that are paid on a commission basis are considered independent contractors and not employees of the company. In such a situation, the company does not pass the control test because the company has no control over the collecting agent’s performance of collection services. On the contrary, the company only has control over the amount of collections made, which is a result of his work. In order for the company to have control over the commission agents, the company should not only have control over the end or result to be achieved but also over the means and methods in achieving the end (Singer Sewing Machine Company v. Drilon, G.R. No. 91307, 24 January 1991, J. Gutierrez, Sr.). Sa ato pa, nga ang collecting agents nga gisweldohan basi lang sa ilang makolekta  or commission basis makonsiderar silang independent contractors gawas lang kun ang kompaniya mi exercise og control sa iyang pag-perform sa trabaho lakip na sa means ug methods sa paghimo niini. Busa sa imo nga kaso ang tubag niini magdepende kun mi-exercise ba og control kanimo  ang kompaniya nga imong gialagaran then makonsiderar kana nga adunay employer-employee relationship tali kanimo ug sa kompaniya ug hayan entitled ka sa mga benepisyo. Hinaut nga akong natubag ang imong pangutana.— Atty. Divine

Alang sa inyong pangutana, ipadala lang ang inyong suwat sa Legal Corner sa Banat News sa V. Gullas Street, Cebu Ctiy or email sa [email protected]. ug akong tubagon ang inyong pangutana matag adlaw’ng  Miyerkules ug Domingo pinaagi sa atong column.