Kayo ang boss ko!

Daghan ang nakalitan sa kusog kaayong pagtay-og nga mugna sa nahitabong linog ug dili tiaw ang gibating kahadlok sa katawhan sa kabalaka nga magun-ob na ilang nahimutangan sa pagtuo nga mao na kadto ang panahon sa katapusan sa kalibutan.

Gumikan sa kusog nga pagtay-og maoy nagsunod nga talan-awon ang pagkahugno sa pipila ka edipisyo nga gipanag-iya sa goberno, pribado  ug mga simbahang Katoliko nga natukod sa panahon pa sa mga Katsila.

Sa lalawigan sa Bohol nga maoy gigikanan sa maong linog maoy gikataho nga daghan ang kinabuhing nakalas ug daghan usab ang naangol sa nahimong mga biktima sa maong katalagman nga mugna sa kinaiyahan.

Mao usab dinhi sa Sugbo nga gawas sa kadaut sa mga edipisyo ug mga simbahang katoliko  may nakalas usab nga kinabuhi ug may mga naangol nga gidala sa nagkadaiyang tambalanan.

Ang pipila nga nanag-iya og edipisyo human sa maong hitabo daw gibati og hilabihan nga kahinangop kay bisan sa nasinati nga  kadaut sa gipanag-iya nilang edipisyo apan sa maong adlaw nga nahitabo ang pagtay-og walay klase ug walay trabaho nga maoy hinungdan nga walay naangol ug walay kinabuhing nakalas nga tagakan sa gipanag-iya nilang edipisyo.

 Sa gipakita nilang kinaiya maoy mahinungdanon alang kanila ang kinabuhi kay kun makalas dili na mauli, sukwahi sa nahugno nga edipisyo nga mahimo pa man nga tukoron og  balik.

Subo lang kaayong palandongon kay ang pipila ka mga opisyal sa kagamhanan (dili hinuon tanan) kay mao man hinuon ang ilang gitan-aw ang kadaut sa mga edipisyo ug ang kadaut sa mga simbahang Katoliko,  apan ang mga biktima sa katalagman nga nalandig sa nagkadaiyang tambalanan daw gilabyan man lang. 

Asa na man diay tong giingon nga ...”Kayo ang Boss, Ko?!”