Mogula matag Martes ug Biyernes

Motabang pa ba kaha sila gihapon tapus sa eleksyon?

Waa gyud kalikayi. Ang pagpanghatag sa cash assistance ngadto sa mga senior citizens, gipahimuslan gayud sa mga politiko.  Samtang atong maisip nga hapsay ang miaging pagpang-apod-apod sa cash gift ngadto sa mga senior citizens, ang maong kalihokan, napuno sa mga politiko sa barangay, complete pa with uniforms.

Matud pa, ang mga master list sa senior citizens, didto ipanghatag sa alalay sa city hall. Ambut tinuod ba ni. Unya, ang mga chapter presidents nga gidudahan nga atua sa pikas makapusta, wala hatagi’g kopya sa master list. Matud pa, mora sila’g walay labut sa kalihokan.

Daghang presidente ang nagmahay intawon.

Yes, Virginia, sa atong giingon sa unahan, waa gyud kalikayi – daghan kaayong mga kandidato ang nagpahimos sa higayon. Didto sila, kaylagi, matud nila, nagpakabana sila, mi-volunteer, ug mitanyag sa ilang serbisyo – paghatag og assistance ngadto sa mga senior citizens.

Of course, daku ang ilang natabang. Ako, pananglitan, waa ko maglisud pagpangita sa akong room gumikan sa ilang assistance. Kun moingon kita nga orderly ug wala ma-inconvenient ang mga senior citizens, usa sila sa nakatabang ini.

Apan, sa sunod nga pagpanghatag sa cash assistance, sa Disyembre puhon, motunga pa ba kaha sila gihapon, aron mo-assist kanatong mga senior citizens? Labi na ang mga pildero magpakita ba kaha sila to assist the elderly? Sila ray makatubag ini.

Unya human na man ang eleksyon, atong hangyuon ang city hall nga hatagan sad unta’g kopya sa master list ang mga chapter presidents bisan kun identified with the BOPK. Ug sa barangay, dili kay ang Team Rama ra nga mga kapitan ang hatagan og kopya. Layo pa bitaw ang 2016.

Of course, maayo kadtong pagka-organize sa city hall. Diri lang sa Guadalupe, hayahay gyud kaayo. Naluoy lang ko sa mga tigulang na kaayo nga naglisud nag lakaw. Ang uban agakon na lang. Unta, dili na unta sila pugson pagpa-appear aron mokubra sa assistance.

Unya, samtang diyutay ra mi sa among room, waa gani mi maglinya, naghuot og taas kaayo ang linya sa uban room. Sa ato pa, waa mabahig pag-ayo ang mga ngalan. Kun gi-alphabetical ang pagbahin, dunay mga alphabet nga mas daghan kay sa uban.

Anyway, akong usbon, at least, diri sa Guadalupe, hapsay kaayo ang miaging cash distribution. Perhaps, gumikan usab kay sa eskwelahan man ang venue. Ug daghan kaayong mga disbursing personnel.

Apan, dihay nangutana ngano kono nga P2000 ra man? P4000 unta kono, ug ang P2000 maoy unya na sa Pasko. Laing nangutana, “Mahinayon kaha ang P12,000 sunod tuig?

What, if walay halin ang SRP?

Duna koy win-win solution ini, Mayor!

In the meantime, paminaw sa Senior Citizens Hour sa DYRC 648 kHz matag Sabado, 5:00-6:00 pm. Tels. 4125249, 4125298.