Bagong ‘big bang’?

Patuloy ang buhay sa ating daigdig

Tayong mga tao’y gumising umidlip;

May araw at gabing laging nagpapalit

Dilim at liwanag laging sumasaglit!

Sa lagay na ito ng daigdig ngayon

Ang buhay ng tao ay nagpapatuloy;

May bansang payapa may bansang patapon

Dahil sa  may gyera’t labanang maapoy!

Di lahat nang araw ang mundo’y payapa

Dahil ginugulo ng katabing bansa;

Ang ating daigdig na dati’y sagana

Sa dami ng tao’y ubos ang  biyaya!

Buong kalawakan ngayo’y iniikot

Nitong ating mundong tila di na bilog;

Dahil nakita n’yang ang ating sinukob

Tayong mga tao ay nagpapanghamok!

Dahil sa ganito ang takbo ng buhay

Ang ating daigdig ay nahihirapan;

Hindi niya batid ang kasasapitan

Kung siya’y lalagi sa kaitaasan?

Bansang maliliit at bansang malaki

Hindi magkasundo sa maraming parte;

Ang bansang tahimik ay inaatake

Ng bansang magulo at gustong maghari!

Sana sa daigdig ang tao’y magbago

Ang puso at diwa maging positibo;

Pag hindi nagbago masasamang  tao –

Isang bagong “big bang” sasapit sa mundo!