Gilas sa World Cup

Human na ang FIBA-Asia tournament diin ang atong Gilas Pilipinas nagmadaugon. Ang FIBA World Cup na sad nga gitakda sa sunod tuig mao na say atubangon sa Gilas Piilpinas.

Mga 24 ka koponan gikan sa nagkadaiyang dapit sa kalibutan ang mangapil sa maong FIBA World Cup nga adto ipahigayon sa Spain.

* * *

Pipila sa mga nasud nga nakakuwalipay na mao ang Iran, Pilipinas, Korea, USA ug Spain.

Unsa kahay naghuwat sa atong koponan didto sa Espanya, no?Dihay pipila ka mga basketball fans ang nangutana kanato. Ug mao sab kini nga pangutana ang gipangutana ta sa atong kaugalingon.

* * *

“Medyo malisud-lisud ang trabahong gisangon ta sa atong koponan unya didto sa FIBA World Cup,” matud pa ni Momoy Nacario, usa ka sports analyst nga atong gipangutana.

Matud pa ni Sir Momoy mga higanteng basketero ang makontra sa atong mga player. UG suma pa niya sila-sila ra ang moatubang niining maong mga higante.

* * *

Ang gitawag nga “sixth man” kuno sa Gilas nga mihatag og dakong insperasyon sa koponan mopabilin dinhi.

Ang gipasabot ni Sir Momoy sa “sixth man” mao ang home crowd -- ang mga fans -- nga mihatag og enerhiya sa atong mga magduduwa pinaagi sa ilang makabungog nga hugyaw samtang nagduwa ang atong Gilas P.

* * *

Bisan gani ang coach sa Korea nakaingon nga ang home crowd nato dako kaayong natabang sa pagpadaug sa Gilas Pilipinas.

* * *

TRIVIA. Daghang salamat sa atong mga higalang magbabasa diha sa Tisa ug Labangon tungod sa ilang wala’y hunong nga suporta sa Banat News.