Conflict of interest

Dili na maihap ang reklamo nga miabot nako sa epekto sa nagpadayong housing project diha sa Upper Kalunasan nga gipasiugdahan sa  kompaniya nga gipanag-iya sa kapitan mismo nga si Nunilon “Dodong” Monares.

Sagad sa mga reklamo mao ang pagbaha sa higayon nga dunay kusog nga uwan ug pagdahili sa yuta. Matud sa mga nangreklamo nga sulod sa gidugayon na sa ilang pagpuyo diha sa maong dapit karon pa mahitabo nga dunay pagbaha. Ilang gitumbok ang proyekto sa kapitan nga maoy hinungdan tungod sa pagkaguba na sa bukid.

Ang mga apektadong molupyo mahadlok moreklamo ngadto sa barangay tungod kay nabalaka nga mabiktima sa pagpangharas sa kapitan. Gani ako mismo nakasinati niini dihang iya ko’ng gipatawag sa barangay kay wala siya makaayon sa akong lindog.

Siya maoy reklamante, siya sab maoy nipirma sa summon batok nako aron moatubang sa Lupon nga siya sab maoy tsirman. Tataw nga kini usa ka matang sa pag-abusar sa gahom.

Atol sa iyang gipatawag nga “confrontation” iya kong gisukmatan nganong akong gihilabtan ang iyang negosyo. Ug iyang gibaharan nga iyang “tudson”.

Wala koy tumong manghilabot sa pribadong negosyo sa kapitan, apan kun ang maong negosyo nakahatag og kahasol sa mga molupyo sa iyang barangay labaw kay ni bisan kinsa, siya unta maoy angayang unang moatiman sa reklamo isip opisyal sa barangay.

Isip sakop sa media, akong katungdanan ang paghatag og tingog sa mga kabus nga apektado sa proyekto apan way igo nga kaisog sa pagpadayag sa ilang reklamo.

Di sab gyud mahimong taguan ang dayag nga “conflict of interest” ni Monares sa maong proyekto. Kini tungod kay siya maoy presiding officer sa konseho sa barangay nga mipasar sa resolution niadtong Agosto 3, 2011 nga nagrekomendar ngadto sa Cebu City Zoning and Planning Board nga hatagan og locational clearance ug site development permit ang iyang kaugalingon nga negosyo.

Usa siya sa nipirma sa resolution nga siya maoy nakabenepisyo. Ang Section 3 sa Republic Act 6713 o ang mas naila nga Code of Conduct and Ethical Standards for Public Officials and Employees miingon nga ang “conflict of interest” mahitabo kun ang usa ka public official; “is a member of a board, an officer, or a substantial stockholder of a private corporation or owner or has a substantial interest in a business, and the interest of such corporation or business, or his rights or duties therein, may be opposed to or affected by the faithful performance of official duty.”Ang Section 7 sa mao gihapong balaud nag-ingon; “Public officials and employees shall not, directly or indirectly, have any financial or material interest in any transaction requiring the approval of their office.”

Dili ba nga sa wala pa magsugod ang iyang housing project nagkinahanglan man ni og pagtugot sa konseho sa barangay?

Gilapas sab sa kapitan ang gimando sa Section 4 sa R.A. 6713 nga nagkanayon nga: “Public officials and employees shall always uphold the public interest over and above personal interest.”

Sa iyang gihimo gipalabi ni Monares ang personal nga interest sa iyang negosyo kay sa interest sa kinabag-an nga naapektuhan sa iyang housing project.

[email protected]