Milagrong nabuhi

Ang tawo bisag maghikog pa, kun dili pa gani moabot ang iyang kamatayon mabuhi pa. Nakasinati na kita og mga grabeng panghitabo. Kun ang atong mata pasultihon, imposible nga may purohan pang mabuhi. Sa ato pa, sagrado gyud ang kinabuhi sa tawo kay ang Dios ra may nasayud sa atong kamatayon. Bisan pag patay na sud-ongon tungod sa sakit nga koma, may tsansang mamaayo pa.

Sama niadtong may nabalita dugay na, nga usa ka polis tambok kaayo nagkaangkaang nang maglakaw ug may artraytis pa, nahabwa ang tinai nga natusak sa mga bala sa armalite. Matud sa doktor nga niatiman sa pasyente, gisuwerte pang mabuhi kay wa kaayo maigo ang delikadong parte sa ginhawaan. Namatay kadto dili sa bala, kay dihang naretiro na giatake sa kasingkasing.

Di pa lang dugay sad, may napatik sa igsuon tang tabloid sa kaulohan, naghisgot sa hitabo nga grabe gyud ka milagro kay nabuhi pa man gyud. Mao kini ang estorya: Ang managsuong mga window washers sila si Edgar ug Alcides Moreno. Anang higayona nanglimpyo sila sa bildong bentana sa ika-47th floor sa taas nga bilding didto sa Manhattan area. Delikado kaayo ang ilang trabaho.

Kinahanglang nakahigot permi sa plataporma nga ilang tuntongan aron di mahulog. Nagsul-ob kanunay og mga safety gears samtang mag-irog-irog pataas – paubos sa gawas sa mga bentanang  limpyohan. Mora sila’g nagbarug sa duyan nga nagbitay sa habog o tag-as nga edipisyo. Sa gihabogon sa bilding kun dili anad aning trabahoa malipong na. Apan sa di damhon ang disgrasya moabot.

Niadtong Disyembre 2007 sa ika- 47 nga andana, nadaut ang platapormang gitungtongan  nila. Tungod sa kabug-at, kusog kining nahulog direkta sa ubos nga dihadiha namatay si Edgar apan si Alcides naabtan sa reskyuwer nga naglingkod lang. Gidala dayon sa ospital. Nakaangkon siya’g kadaut sa tuhod, utok ug hawak. Ang mahinungdanon nga buhi pa siya nga usa ka milagro.

Busa, unsa may gipakita nato nga mahimong pagtulon-an sa kinabuhi? Kinahanglan nga dili lang pag-amping sa lawas ang atong buhaton. Ato usab matngonan nga makatuman sa atong spirituhanon tulobagon sa kahitas-an. Samtang may kinabuhi pang gipahulaman kanato, pahimuslan nga mabuhat gyud ang hinungdan ngano kita gihimo. Way lain kundi mao ang hingpit nato nga pagsunod sa mga tulomanon sa atong Makagagahum.