Mga lamas sa kinabuhi ang ritwal sa pagdason

Dako og kahimoan ang pikpik sa matag abaga sa tawo sa bisan unsang maayo kun kalamboan nga iyang nahimo. Kini makapalig-on sa iyang pagtuo sa iyang kaugalingon ug sa pagpalambo pa gyud sa  iyang katakus. Magamit pud nato kini sa atong kabataan. Ato silang higugmaon dili tungod sa ilang posibling mahimo (doing) kundili ato silang higugmaon sa ilang pagka-sila (being) sanglit ang doing ug being managlahi mang mga butang.

Mas mahinungdanon ang being kaysa doing. Matag bata adunay potential nga usahay dili dayon makit-an diha-diha. Adunay mga ginikanan nga bugtong nakita nila ang mga buhat sa ilang anak. Wala nila makita ang mas halawom nga bili sa bata ug kun nganong dunay mga higayon nga dili mahimo sa bata ang mga developmental tasks nga gipaabot nga himuon nila sibo sa ilang panuigon ug kahimtang. Mao nga dunay nga ginikanan nga pugoso diha sa pagpahimo sa mga buluhaton nga dili sibo sa kahimtang sikolohikal, pisikal, o emosyonal sa ilang anak. Ang resulta, kadaut na lang hinuon ang nahiagoman dili lang sa ilang anak kundili usab sa palibot.  Mao nga mahinungdanon kaayo ang Ritwal sa Pagdason. Epektibong pamaagi kini aron ang bata makaamgo nga bisan pa man siyang kalinghod, mamahimo diay siya gihapong produktibo dili alang nila ni mama ug papa kundili sa iyang kaugalingon usab. Ang yano apan matinund-anong pakpak ug pag-uyon makatabang aron ang bata mas magmadasigon pa diha sa pagdiskubre sa mga pwede pa niyang himuon sa umaabot. Pamalandongi kining kukabildo:

Mama: Mary Therese Day! Nindota sa imong drowing oy! Makamao gyud ka day!

Mary Therese: Hiwi man ang drowing ma?

Mama: Sige lang gud. Total, matarong man gihapon na basta sige lang gyud ka’g practice ha? Sige kay palitan pa gyud tika og mas daghan pang drowing materials!

Ang mama wala magtan-aw sa hiwi nga drowing kundili iyang gisugnoran ang interes sa iyang anak sa pagdibuho. Ang bata nga nakasinati sa maong init nga suporta ang mas maikag pa gyud nga iyang palambuon ang iyang katakus.