Ang panahon sa tingbitay sa iro

Ang pulong nga tingbitay sa iro maoy nagsilbing panultihon sa atong katigulangan sa mga bulan sa matag tuig nga ang kasagaran mao gayod ang panahon nga masinati ang kalisod sa katawhan nga mao usab ang panahon nga masinati ang pagmahal sa matag kilo sa bugas.

Sa matag tuig ang bulan sa Hulyo maoy gitumbok sa mga katigulangan nga ilang gitawag og tingbitay sa iro kay mao man usab ang bulan nga magnihit ang kuwarta ug masinati usab ang pag-usbaw sa presyo sa matag kilo sa bugas.

Matud pa sa mga katigulangan nga ilang gitawag og tingbitay sa iro ang bulan sa Hulyo sa matag tuig kay mao man usab ang panahon nga ang mga mag-uuma nagpaabot pa sa mga bulan sa ting-ani nga mao ang Oktobre ug Nobiyembre gawas sa Disyembre nga panahon sa paghudyaka kay gawas nga pasko ug natawo ang Ginoo nga si Hesukristo mao usab kini ang bulan sa pagdawat sa bonus sa mga nagtrabaho.

Gitataw nila nga nahimong magnihit gayod ang kuwarta sa bulan sa Hulyo kay bag-o pa man ang bulan sa Hunyo nga maoy pag-abli sa klase diin ang mga ginikanan nga nagpatungha sa ilang kabataan mahutdan usab og salapi kay ang kasagaran  gibayad man nila sa matrikula sa tulunghaan. Si Lucy Rosales nga maoy tigpamaba sa National Food Authority (NFA) 7 miingon nga samtang magpaabot pa ang mga mag-uuma sa ting-ani dili usab kalikayan nga mamatikdan ang pagsaka ang presyo sa matag kilo sa bugas.

Hinuon iyang giklaro nga masinati ang pag-usbaw ang presyo sa matag kilo sa bugas mao lamang ang commercial rice apan ang bugas gikan sa NFA nagpabilin sa P27  ang matag kilo.

Giklaro niya nga dili kabalak-an dinhi sa Sugbo nga masinati ang pagnihit sa bugas kay ang ilang bodega puno pa sa sinakong imported nga bugas nga dili pa mahurot alang sa katawhan sa Sugbo.