Unsay buhaton kun ang imong silingan nagmugna og kalingawan nga nakadisturbo kanimo

Taliwala sa nagkamoderno nato nga panahon karon, daghan na kaayong paagi nga madisturbo ang usa ka tawo tungod sa kasaba sa iyang palibot. Usa sa labing common kaayo mao kining mga kalihukan matag gabii sama sa videokehan, diskohan ug uban pa, ilabi na kun adunay umaabot nga fiesta. Apan unsa bay imong buhaton kun ang maong kasaba sa imong palibot nakadisturbo na ug nakahasol na kaninyong mga molupyo? Kana nga pangutana ang atong tubagon karon sa atong column.

Dear Atty. Divine,

Nakabasa kami sa imong column, pinetsahan February 24, 2013,  pinaagi sa internet mahitungod kang 'Lina' sa iyang problema sa silingan nga nagsige og videoke halos kada gabii.

Naaghat kami sa pagsulat kanimo kay susama pud niini ang among problema.  Atty, aduna kami silingan nga nagtukod og kapilya ug mag-fiesta matag tuig. Matag tuig pud kaming magsige og hangyo nga dili lang kaayo kusog ang 'sound system’  ug nga sayohon paghuman ang kalingawan matag gabii. Nagsilbi kining kalbaryo nga among pagaantoson  matag tuig tungod kay dili kami makapahulay og sayo gikan sa trabaho sulod sa 10 ka adlaw gumikan sa kasaba. Nagkaatubang na kami sa barangay pero wala kami matagbaw sa resulta.

Ang akong pangutana, Atty. pwede ba namong mapasakaan og kaso ang among silingan bisa’g nahuman na ang fiesta? Unsa ang mga ebedinsya nga pwede namong magamit? Daghan kaayong salamat. Kanimo nagmatinud-anon. — M. Family

Dear M. Family,

Matag usa kanato adunay katungod nga mopasaka og kaso ilabi na kun ang imong katungod gilapas sa ubang tawo. Apan sa dili pa nimo kini ipaabot sa Korte mas maayo nga mag-agi sa kamo sa barangay aron sa pag-areglo ilabi na kun kamo mga silingan ra. Sa imo nga kaso miagi na kamo sa barangay apan wa mo matagbaw sa resulta niini hinungdan nga plano ninyong mopasaka og kaso. Tinuod man nga dili lalim kun panahon sa kagabhion gusto unta  ta nga matulog apan dili ta kapahuway gumikan sa kasaba sa atong silingan ilabi na kun adunay disco o videokihan. Kun inyo nang gihimo ang paghangyo sa inyong silingan nga hinayan ang ilang sound system, unya nangabot na sab mo sa barangay apan wa gihapoy kasulbaran, wa gyud kay laing kadangpan kun dili ang Korte. Ubos sa atong Civil Code mamahimo ka nga mopasaka og reklamo batok sa imong silingan aron mapahunong ang iyang pagsaba-saba  basi sa Article  694 kon Nuisance. Mamahimo sab nga di ka na moagi sa Korte pagpahunong sa saba pinaagi sa paghangyo sa inyong barangay official sa pagtangtang sa sound system. Mamahimo sab nga imong basihan sa reklamo ang Article 155 sa Revised Penal Code (Alarms and Scandals) nga diin kini basi sa balaod kini maong krimen mahimo sa usa ka tawo pinaagi ning mosunod:

C. Disturbing the public peace while wandering about at night or while engaged in other nocturnal activity. Examples are: 1). shouting at night even if by a vendor, 2). holding a party in one’s house but with loud music, 3). partying or quarreling in the street , 4). jamming or acting as street musicians. Sa ato pa, kanang kasaba sa ilang sound system panahon sa kagabhion makonsiderar kana nga kalapasan sa Revised Penal Code sa Alarms and Scandal.  Ang mga ebidensya nga imong andamon mao kining mosunod, kun aduna kay mga hulagway sa sound system nga maoy nakaingon sa kasaba mas maayo ug ang Affidavits gikan kaninyong mga biktima  ug ang Certification gikan sa barangay nga nagpamatuod nga nag-abot na kamo ngadto apan wa mo maareglo. Hinaut nga akong natubag ang inyong pangutana. Daghang Salamat and God Bless!— Atty. Divine

Alang sa inyong mga pangutana, ipadala lang sa Legal Corner sa Banat News sa V. Gullas Street, Cebu City or email sa [email protected]. ug akong tubagon ang inyong pangutana pinaagi sa akong column matag adlaw’ng Miyerkules ug Domingo.