Ikatulong hilisgutan: Mga sukaranang pagtulon-an sa simbahan

A. Ang pulong Satanas/Diyablo/Demonyo

Ang ngalan nga Satanas nagagikan sa Hebreyong Pulong  ha-Satan nga nagpasabot og kaaway. Samtang ang ngalan nga Diyablo gikan sa Griyegong Pulong Diabolos nga ato pa: “Hinungdan sa Pagkabahin-bahin. Gipunting kini sa pangulo sa mga masupakong mga anghel nga si Lucifer nga nangulo sa mga kaubanang mga anghel aron mohimo og usa ka pakigbatok ngadto sa Dios nga ilang magbubuhat. Gihinginlan sila gikan sa langit ug gitambog sila sa yuta.

“Unya may gubat didto sa langit. Si Miguel ug ang mga kaubanan niyang mga anghel, nakigsangka sa dragon ug sa mga anghel niini. Apan nabuntog ang dragon ug ang mga anghel niini ug gipanghinginlan sila gikan sa langit. Gitambog ang dakong dragon, ang karaang bitin nga ginganlan og Yawa o Satanas nga maoy naglimbong sa tibuok kalibutan. Gitambog siya uban sa tanang mga anghel niya ngadto sa yuta.” (Gip. 12;7-9).

Siya “... Ang mamumuno sukad pa sa sinugdan, bakakon ug amahan sa tanang bakak, si Satanas ang malimbongon sa tibuok kalibutan.” (CCC num. 2852) Usa siya ka anghel nga gikan sa Diyos nga iyang Magbubuhat nga nibuhat sa tanang mga butang makita ug dili makita. (Col. 1;16) Nga sa ato pa, sa sinugdanan gihimo ang mga anghel nga maayo. Kuyog ning maong kahimtang, ang mga anghel adunay kaugalingong panghunahuna ug kabubut-on. Makapili sila sa tali sa maayo ug sa dautan. Kay gipili man nila ang dautan nan, nahimo usab silang dautan ingon nga mga anghel o espiritu. Sa dihang gipili ni Lucifer ang dalan palayo sa Dios, nahimo siyang kaaway sa iyang Magbubuhat ug ning maong kapasikaran kaaway ug gikasilagan sa yawa ang bisan  unsa nga gihigugma sa Dios ug binuhat sa Dios. Tuyo sa yawa nga pasakitan ang Dios pinaagi sa pagdagmal ug sa pagpanamastamas sa bisan kinsa o unsa nga gibuhat sa Dios ug iya sa Dios.