EDITORYAL - Ang maayong lider alang sa matuwid na daan

Ang  usa  ka lider  sa  bisan  unsa  nga  organisasyon mahimong  pribado  o kaha  iya  sa goberno, sama   siya  sa usa  ka ginikanan  nga kaantigo  mopahat-pahat  sa  mga  butang  sama sa pagkaon, o kaha  salapi  sa patas  nga paagi  ngadto  sa iyang  mga  anak.

Tungod  niini  ang  usa  ka  maayong  lider  kamao  siya modala  sa  iyang  katungdanan  sa  tinarong  nga  paagi  nga  di  masawayan  sa sosyedad  o katilingban.

Kay  sa higayon  nga  masil-ingan  nga  di  siya maayo  modala sa katungdanan ilabi  na  kun  may  kinaiya  siya  nga  bintahador, aw  ang  mga  tawo  di  na  ganahan  maminaw  kaniya, di  na  ganahan  motan-aw  kaniya ug  labaw  sa tanan  di na  ganahan  nga  makadungog  sa iyang  ngan.

Sa  laktud  panghimarauton  siya  sa katilingban  tungod  sa  kinaiya  niya  nga  di  makiangayon.

Sama  niining  isyu  nga ang  dakong opisyal  sa kagamhanan sa dakbayan  sa Sugbo kinsa  sa samang  higayon  may  eskuylahan , unya  sa  kadaghang  kolehiyo  ug unibersidad  ning  dakbayan  nga  akriditado  sama  sa iyang  eskuylahan  nga  makadawat  sa  mga  scholar  sa goberno, ang  mao kunong  opisyal  maoy  mihakop  sa kinabag-ang    mga scholar    ug  ang  ubang  akriditadong   eskuylahan  gipiskan  na lang  og  ginagmay, di  ba  usa  man  kini  ka  pamintaha?

Angay  baya kini  nga  kuwestiyonon  kun  nganong  ingon  niini  ang   kinaiya  sa  usa  ka   opisyal  sa goberno  nga  gitugyanan  ug gitahasan  og  usa ka katungdanan  nga magbuot  sa pagbahinbahin unta  sa  mga  scholar  sa  patas  nga  paagi  ngadto  sa ubang  mga  tulunghaan. 

Sa  programa  ni  Presidente Aquino  karon  diin gusto  niyang  mosubay  ang  tanang  opisyal  sa goberno  sa    “Matuwid na  Daan” daghan  kaayong nalipay  niini.

Tungod  kay mayoridad  sa  mga Filipino gusto  gyud  sa  malinawon  ug  tinarong  nga  pangagamhanan  ug  kadtong  mga  hiwi  nga mga  lider ug opisyal   sa  goberno  makadawat  sa ilang  panghimaraot.

Apan  kun  ingon  niini  ang  matang sa opisyal  sa goberno  nga  tataw  kaayong  wa  mosubay  sa tul-id  nga dalan, unsa kahay  ikasulti  ni  Presidente  Aquino  kun  iya kining  masayran? May  gobernador   dinhi  nga gisuspenso ,  di kapartido  sa  presidente,  ug  kun  iyang kapartido  ang magpasaway unsa  may iyang  buhaton?