Ang Simbahang Katoliko

Nag-atubang karon og dakong hagit ang Simbahang Katoliko Romano human mopahibalo si Papa Benedicto XVI nga mo-resign sugod karong Pebrero 28.

Gihimong rason sa Aleman nga Santo Papa ang iyang katigulangon nga babag sa iyang pagpadayon sa katungdanan isip Obispo sa Roma ug prinsipe sa kalibutanong Simbahan.

Giisip sa mga tigpaniid sa Vatican nga ang simbahan karon nagsubay sa bag-o ug wala pa masulayi nga agianan nunot sa makaguol nga pahibalo sa successor ni San Pedro nga siya’y unang supremo sa Romano Katoliko nga mo-resign sa iyang kaugalingong kabubut-on sukad 700 ka tuig ang nakalabay.

Sa iyang pagbiya unya sa Pebrero 28, ang simbahang Katoliko mag-atubang gihapon sa hagit batok sa same sex marriage, nga gibarugan sa mga nangaging Santo Papa.

Ang secularism nga gipakatap ni Papa Benedicto XVI sa iyang papacy gipaabot nga usa ka hagit sa iyang sumosunod. Kun ipadayon kining konsepto sa secularism, gilantaw kini nga maoy tubag sa dakong krisis sa mga simbahan sa Europa, diin ang gidaghanon sa mga Katoliko nagkagamay.

Dakong hagit usab sa pamunoan sa simbahan ang gahum sa pagkabig sa mga magtutuo dinhi sa Pilipinas, diin ang mga Katoliko gihulagway nga nagkatibulaag nunot sa pagduso sa gobyerno ni Pres. Noynoy Aquino sa reproductive health nga karon hingpit nang nahimong balaod, bisan sa hugot nga pagsupak sa simbahan.

Ang Pilipinas giisip nga maoy duyan sa pagtuo dinhi sa Asya tungod kay dinhi (sa Sugbo) magsugod ang Katolisismo. Apan nag-atubang kini og hilabihan kadakong hagit mugna nianang RH law.

Si Manila Archbishop Chito Cardinal Tagle kinsa giila nga usa sa labing bata nga sakop sa college of cardinals sa Vatican, nahasulod sa diyutay’ng gidaghanon sa mga cardinal nga mga “papabile.”

Kun ang usa ka tawo, kasagaran cardinal, ilhon nga usa ka papabile, naggunit kini sa mga kalidad sa usa ka Santo Papa ug ilhon kining kandidato pagka-Santo Papa.

Usa ka dakong dungog sa Pilipinas ang pag-angkon og usa ka silingan nga mamahimong sakop sa consistory sa Vatican. Apan kining maong dungog nagtangag og dakong hagit nga atong pamatud-an ang atong pagkasilingan ni Tagle, atong puy-an ang atong pagka-Katoliko nga Pilipino pinaagi sa pagpadayon sa pagsupak sa mga polisiya sa gobyerno nga magguba sa atong pagtuo, moralidad ug labaw sa tanan sa balaod sa kinaiyahan sama sa RH law, same sex marriage ug divorce.

Adunay daghang mga Katoliko (gani, ang uban mga pari) nga hilabihan na ka-pilosopo pinaagi sa paghimo og kaugalingon nilang interpretasyon sa balaod sa Diyos ug pagsupak sa pagtulon-an sa simbahan nga gibungat sa mga kadagkoan sa simbahan.

Unya, kining mga supakerong mga Katoliko ang magpunay og ingon nga nagkatibulaag na ang simbahang Katoliko.

Pasalamat lang ko nga aduna gihapoy daghang mga Katoliko nga lawom gihapon ang pagtuo sa mga pagtulon-an sa simbahan, ug nagtuo pa gihapon sila sa kahiusahan sa simbahan.