Pabilo sa kawat
Kon duna lang gyod untay matinud-anon nga imbestigasyon sa flood control projects, mahibaw-an nga ang kinawatay nagsugod sa administrasyon ni kanhi Presidente Rordrigo Duterte ug nigrabe sa pagbanos nilang Presidente Ferdinand Marcos Jr. ug kanhi House Speaker Martin Romualdez.
Niulbo niadtong 20018 ang pasangil sa mga kongresista nga dunay binilyon ka pesos nga gigahin para sa flood control projects bisan wala pangayoa sa Department of Public Works and Highways (DPWH). Gipasanginlan nilang utok sa maniobra mao si kanhi Budget Secretary Benjamin Diokno. Nga wala nila maapiki kay giduphan ni Duterte.
* * *
Pagkahuman sa termino ni Duterte sa 2022, nahunong ang reklamo sa mga kongresista. Kay ubos sa sistema nga gikatahong giumol ni anhing DPWH Undersecretary Cathy Cabral gibahinan nang mga kongresista ug mga senador ug mga sakop sa gabinete.
Ang BBM (Baselined-Balanced-Managed) Parametric Formula, nga giingon ni kanhi DPWH Undersecretary Cabral ray nakasabot, nipahilom sa mga magbabalaod kay garantisado nga kada usa nila dunay labing menos usa ka bilyon ka pesos nga allocables ug non-allocables sa mga proyekto nga ilang kakuhaan og 25% ngadto sa 30% nga kickback.
* * *
Giisip nga pabilo sa kinawatay ang Build, Build, Build (BBB) Program ni Duterte nga nipaburot sa budget sa infrastructure sa DPWH ug ubang mga ahensiya. Tungod sa limitasyon sa absorptive capacity sa mga ahensiya, natanggong ang pundo, nalangay ug wala magkadimao ang implementasyon ug nakalusot ang mga proyekto nga wala kinahanglana, ug busa wala kapusli.
Mas paspas ang gasto sa administrasyon nilang Marcos ug Romualdez. Pero dakong bahin sa pundo nisimang sa pribadong mga bolsa.
* * *
Maong ni-abiba ang katawhan sa pasalig ni Marcos Jr. sa pag-imbestigar, pagkiha ug pagpriso sa labing dagkong mga kawatan sa gibanabana nga P1.7 trilyones nga flood scandal. Pero nahugno sila kay human sa pasiunang kadasig naluya ang imbestigasyon ug pagpasaka sa mga kaso.
May mga timaan nga gigamit na sa impeachment ni Bise Presidente Sara Duterte. Abunda sa mga proyekto ang mga kongresista nga nipabor ug gihikawan sa mga proyekto ang mga nisupak. Wala madayon ang pagpasaka og mga kaso batok nilang Senador Chiz Escudero ug Senador Joel Villanueva aron pagseguro nga ang liderato sa Senado dili mo-sabotahe sa impeachment trial.
* * *
- Latest
