Diha sa paggambalay sa mga laraw

Matag usa nato dunay laraw sa kinabuhi. Gikinahanglanon kaayo kini aron mahatagan og igong direksiyon ang atong panaw ingon nga indibidwal, katilingban, organisasyon ug patigayon!

Matud pa ang matag pangandoy ug tinguha magsugod man sa ginagmay nga pangindahay.

Apan unsaon man kini sa paghimo?

1. Mahimong sugdan nimo ang gitawag nilang visualization kun ang visual meditation. Ginamit ang imong imahinasyon imong sud-ongon ang imong kaugalingon pipila ka mga tuig gikan karon.

2. Isulat ang imong laraw diha sa papel. Nagpaila kini nga seryoso ka sa imong gitinguha. Ang bisan unsang seryoso kinahanglan nga idokumento. Sama sa usa ka kasabutan nga nagkinahanglan og pirma.

3. Matag laraw kinahanglang tataw ug specific. Dili maayo nga generic lamang sanglit malisud ang pagkab-ot niini. Hinunoa, kining maong matang sa panghunahuna ug paglaraw makadala man hinuon og tumang kalibog ug kawalay kapaingnan.

4. Matag laraw nagkinahanglan og gilagda nga panahon. Dili maayo nga moingon ka: “Buhaton ko kini puhon, hinunoa moingon ka, buhaton ko kini ugma dayon sa may alas singko sa hapon!” kini aron ang imong hunahuna ug kusog makasentro gyud sa maong laraw. Dili mausik ang imong kusog.

5. Matag laraw nagkinahanglan og lihok. Dili paigo nga mopadayag ka sa imong laraw. Hinunoa kinahanglang imong pagahimoon ang mga gambalay aron ang bisan unsag gilaraw mahitabo gayud sulod sa panahon nga gitakda.

6. Nagkinahanglan kini og Commitment. Kun wala ang commitment dili gyud kini mahitabo.

7. Nagkinahanglan kini og Accountability. Kinsa ang paninglan sa matag linugdangan sa usa ka laraw. Sa ato pa, si bisan kinsa nga nalambigit niini kinahanglan gyud nga manubag.

Ug ang pinakahaom nga panahon sa pagtuman niini mao man ang karon kun ang kasamtangan.