Ebidensiya batok VP Sara
Nisaad ang prosekusyon sa impeachment trial ni Bise Presidente Sara Duterte nga duna silay bag-ong ebidensiya nga ipagawas sa pagpadayon sa husay karong semanaha. Wala silay detalye gawas sa pag-ingon nga wala maapil kining ebidensiya sa impeachment proceedings sa House justice committee.
Nitakdo sab ni sa pasalig sa mga sakop sa House panel of prosecutors nga kon nibilib ang publiko ni Atty. Amando Virgil Ligutan sa niaging semana mas makugang pa gyod ang mga abogado ni VP Sara ni private prosecutor Benjamin Tolosa nga mopresentar og laing testigo karong semanaha.
* * *
Kinsa sa upat ka testigo sa prosekusyon ang mopabuto sa bag-ong ebidensiya: National Bureau of Investigation (NBI) Director Melvin Matibag, NBI BARMM Director Jeremy Lotoc, Executive Director Belinda Bello sa Legislative Security Bureau, o Chief of staff Zuleika Lopez sa Office of the Vice President?
Dili mahitabong mopiyait si Lopez. Posibleng usa sa unang tulo ang mobisto sa bag-ong kasayuran atol sa husay nga posibleng tambongan ni VP Sara parte sa hulga sa pagpapatay nilang Presidente Ferdinand Marcos Jr., First Lady Liza Marcos ug kanhi House Speaker Martin Romualdez.
* * *
Si Lontoc maoy usa sa upat ka imbestigador sa NBI nga nisusi sa hulga ni VP Sara niadtong Nobyembre 23, 2024. Nirekomendar ang team ni Lontoc nga pasakaan si VP Sara ug usa ka count sa inciting to sedition ug tulo ka counts sa grave threats. Nitug-an si Lontoc nga dunay assassin nga gikontrata si VP Sara.
Niangkon si Matibag nga wala pa silang kaila kinsay gikasabot ni VP Sara. Pero ila nang nakumpirmar nga ang nipasalig sa pagtuman sa iyang sugo mao ang usa sa dagkong mga opisyal sa nabungkag na nga Vice Presidential Security and Protection Group.
* * *
Duna na bay ngalan silang Lontoc ug Matibag sa hitman nga gisugo ni VP Sara? O duna bay affidavit sa kumpisal sa suspek nga gikatahong dako og ranggo sa Philippine Army?
Kon dili gikan ni Lopez ang bag-ong kasayuran, unsa may iyang papel sa paneguro sa prosekusyon nga mas molig-on ang ilang mga ebidensiya? Tak-om ang prosecutors unsay ilang mga pangutana ni Lopez nga gipaabot nga suportahan gikan sa Senate gallery ni VP Sara.
* * *
- Latest
