EDITORYAL— Tabang para sa Mindanao

Mag usa ka semana na ang nakalabay human sa 7.8 magnitude nga linog nigusbat sa daghang mga probinsya sa Mindanao ilabi na sa Saranggani nga niresulta sa kamatayon sa daghang mga tawo.

Gawas sa kinabuing nakalas, daghang imprastraktura ang nangaguba, panginabuhian nga naapektahan ug ang kalisdanan sa paghatud sa mga hinabang para sa mga biktima nga naa sa mga hilit nga lugar.

Ang nahitabo didto, susama sa nahitabong linog dinhi sa Sugbu sa miaging tuig, tungod sa pagkaguba sa daghang mga dalan, daghang mga lugar ang lisud hatdan og hinabang.

Pun-an pa gyud sa dautang panahon nga nihabol karon sa kalangitan sa Mindanao, napun-an ang kalisdanan sa mga tawo didto.

Sa pagkakaron, kinahanglang ipadaplin lang usa ang politika, mas gikinahanglan sa mga kaigsuonan nato didto ang tabang tungod sa ilang sitwasyon karon.

Daghan sa mga Pilipino ang gustong motabang sa mga biktima didto apan ang problema mao ang mga dalan padung sa barangay nga naapektahan ilabi na kadtong mga lugar sa kabukiran.

Dinhi sa Sugbu, nag-amutay ang mga local government units para naay mapadala didto sa Mindanao.

Sa dihang nahitabo ang linog dinhi, wala magpanuko ang mga taga Mindanao sa pagpadala og hinabang dinhi sa ato.

Busa makiangayon lamang nga suklian sab kini og kaayo sa mga Sugbuanon. Sa panahon karon, gikinahanglan ang pagtinabangay para makabangon ang mga naapektohan.

Kinsa ra man guy magtinabangay karong panahon sa katalagman kondili ang mga Pilipino ra gihapon.