Pamolitika sa Sinulog

Maayong hunongon na sa Sinulog Foundationn ang pagduhig og politika sa kasaulogan sa Pista Senyor pinaagi sa pagpadugok og mga politiko sa grandstand sa Cebu Sports Center panahon sa Sinulog parade.

Ang Sinulog usa ka relihiyoso nga kasaulogan. Naduhigan na ang dagway sa kasaulogan tungod sa pag-komersiyalisar sa mga tagdumala niini, pun-an pa karon nga migrabe na hinuon ang paghimo niini og “political festival” pinaagi sa pagpatambong og mga kandidato nga linya sa administrasyon sa siyudad sa Sugbo.

Dakong kaulawan ang nahitabo sa pagkabaniog nga mas imbitado sa mga tagdumala nga ubos sa pagmando ni Mayor Mike Rama ang mga kandidato sa United Nationalist Alliance (UNA) ni Bise Presidente Jejomar Binay kay kang Presidente Noynoy Aquino.

Si Noynoy namahayag nga wala siya makadawat og invitation gikan sa siyudad. Apan kun ang taga-siyudad ang pangutan-on, napadad-an ang presidente. Kinsa kahay namakak? Ipanghimakak na lang gyud sa presidente kining invitation? Imposible usab. Mas motuo hinuon ko nga gipamolitika sa kampo ni Mike kining Sinulog. Si Binay maoy iyang pinalabi kay kang Noynoy nga mao unta ang iyang presidente.

Makasabot hinuon kita kay na-itsa-puwera man si Mike sa Liberal Party pabor kang Kongresista Tomas Osmeña. Kinsay Mike nga mo-imbitar sa presidente nga sakop sa partido nga mitagak kaniya?

Apan maayo ba nga binuhatan sa usa ka mayor ang pagpanimalos sa kontra sa politika pinaagi sa paggamit sa kapistahan ni Sr. Sto. Niño?

* * *

Bisan unsaon og pangulipas sa mga politiko nga ang ilang pagtuo maoy nag-hari hinungdan nga adto gyud sila magkawaykaway sa ilang mga kamot sa grandstand matag Sinulog, dili gyud motuo ang mga yanong lungsoranon niini.

Sama ra usab nga dili maayong husgaan ang anaa sa hunahuna ug galamhan ni suspended Gov. Gwen Garcia nganong gusto gyud siyang mosayaw bisan nabulit na sa mga pagsaway.

Sayon ra ang pagtuo sa ilang pagpakita sa grandstand.

Apan lisod kaayo tuohan ang ilang pagpakita sa pagtuo kang Sr. Sto. Niño kun sila malisod hikit-an sa Basilica Minore del Sto. Niño. Mas mopakpak ko sa mga politiko nga sama nilang Kongresista Eddie Gullas ug Raul del Mar nga bisan sa kahuot sa bagang duot sa mga magtutuo, mokuyog gyud sa prosesyon sa Balaang Bata. Sukad pa kaniadto nga si Sir Eddie ug si Sir Raul mo-uban gyud sa prosesyon.