Petisyon kang Sto. Niño

Na-obserbahan sa mismong kaparian sa Basilica del Sto. Niño ang mas daghang tawo nga nidagsa sa matag misa nobenaryo alang sa kapiyestahan sa batang Hesus. Kung itandi sa miaging tuig, karon mas dasok ug mas daghang tawo ang nitambong sa misa. Ug sugod karong gabii, bukas na ang pilgrim center baynte kuwatro oras aron sa paghatag og higayon sa tanan nga makadagkot og kandila ug makahalad og pag-ampo. Sa pagdagsa sa mga deboto, duha  lang ka butang ang sigurado—nangayo og pasalamat sa mga grasya nga nadawat ug mangayo pa og dugang grasya nga buot pang madawat.

Apan mas maayong bahigon sa mga deboto ang ilang pagtuo ug pagtahod sa batang Hesus. Ang pagdasok sa usa ka simbahan sa pagtuong mas madungog ang pag-ampo, usa ka dakong bakikaw nga kamatuoran. Omnipresent! Buot ipasabot anaa ang Ginoo sa bisan asang dapit gikan sa imong kasing-kasing hangtud sa labing lapad nga bahin sa kalibutan. Ang pag-ampo ug pagpadayag og pagtahod sa batang Hesus su’d lang sa usa ka simbahan, usa ka dakong insulto sa atong pagtuong katoliko. Kini ang usa sa mga hinungdan nga kataw-an ‘ta sa ubang relihiyon tungod sa atong mabaw ug mubo ra kaayo nga panlantaw ug pagsabot sa atong pagtuo.

Sa kadaghan sa mga tawo nga nagpunsisok sa tanang relihiyosong kalihukan gikan sa misa nobenaryo, traslacion, fluvial ug foot procession, dakong responsibilidad alang sa kaparian ug mga relihiyoso ang pagpasabot ngadto sa mga deboto, nga di’ ang imahe ang sentro ining tanan nga debosyon—apan ang Ginoo kansang presensya imong makita ug mabati sa bisan asang suok sa kalibutan. Tahuron ‘ta ang di’ masukod nga pagtuo sa mga tawo sa milagrosong bata tungod kay sa atong pagkatawo, nakasinati ‘sab siguro ‘ta sa maong milagro. Apan mas labaw natong tahuron ang kamatuoran sa pagtuo nga wa’y lugar, wa’y panahon, wa’y simbahan nga gipili.

Ang pagpangaliya sa kahitas-an usa na ka normal nga pagpadayag sa pagtuo. Apan kung mapuno na lang sa pagpangayo og grasya apan makalimtan ang pagpasalamat, kini  na ang labing dakong sagpa sa atong pagtuo. Daghang deboto ang buot mo-kompleto sa nobenaryo tungod sa ilang pagtuo nga ihatag ang katumanan sa ilang gihangyo nga butang, maayong panlawas o kalinaw sa kasing-kasing o kalibutan. Usahay, mamahimong ulog-ulog na lang ang pagsimba tungod sa taas nga litaniya sa mga butang nga pangayuon. Mas maayo sigurado nga ipatigbabaw ang imong intensyon sa pagpasalamat diha sa siyam ka adlaw nga misa tungod kay mas labi ning mahinungdanon itandi sa magsige na lang og pangayo.

Mas nahibawo ang kahitas-an sa imong mga panginahanglan. Ug mas nahibawo si Senyor Sto. Niño unsay mga tukmang gasa nga haum alang nimo. Bisan ang mga butang nga wa’ pa nimo gilitok sa imong ngabil o mga oportunidad nga wa’ pa masu’d sa imong huna-huna, mas nahibawo ini ang kahitas-an. Usahay, bisan wa’ pa ta mangayo, gihatag na kanato ang tanan. Di’ ba mas haum nga ipatigbabaw ang pasalamat sa di’ pa mangayo sa mga butang nga gihangyo. Ang labing mahinungdanon mao ang ligdong nga kasing-kasing ug bukas nga panghuna-huna nga modawat sa bisan unsang gasa nga ihatag. Labaw sa tanan—ipangaliya ‘sab nga mamahimo kang manggihatagon luyo sa daghang grasya nga nadawat. Ang labing epektibong sukod sa grasya—mao ang imong katakos sa pagpa-ambit ini ngadto sa mga nanginahanglan. Ug adunay mga higayon nga ihatag ang grasya tungod kay ang tulay aron mahatag ang maong grasya ngadto sa mga nanginahanglan.

Apan sa kulturang Pinoy—di’ mahimong mabasol nga ang pulos pagdangop sa kahitas-an ang buhaton sa panahon sa pagsuway. Kung adunay mga problema, inay mohimo og mga lakang aron masulbad ang tanan, mas ipalabi pa ang paghangad sa langit ug pagpangayo og tabang. Di’ mabasol ang mga Pinoy sa maong matang sa pagtuo. Apan usahay, mas labing maayo nga ibutang sa tukmang konsepto ang pagtuo ug bisan ang pagsangpit ngadto kaniya.

Email: [email protected] or [email protected].