Nganong nagmakuli

Gisaway sa iyang mga kritiko si suspended governor Gwendolyn Garcia tungod sa iyang pagmakuli sa pagkanaog sa katungdanan human siya suspensoha sa Malakanyang bali’g unom ka bulan.

Dinhi sa nasud dili lang si Governor Gwendolyn Garcia ang nagdumili sa pagbiya sa ilang katungdanan human sila tangtanga ug suspensoha. Sa Ilo-ilo nagdumili pagkanaug sa iyang katungdanan si Governor Tupas human siya tangtanga sa iyang katungdanan sa Malakanyang. Sa Makati City nagdumili usab sa pagkanaug sa iyang katungdanan si Mayor Jejomar Binay human siya suspensoha sa pagka mayor. Busa dili na ta mahibulong kun nganong mao usab kini ang gihimo sa gobernadora sa lalawigan sa Sugbo. Sa laktod nga pagkasulti nahimo na kining praktis sa atong mga pinili nga opisyal ug bisan gani niadtong mga tinudlo.

Ang gobernadora nga gisuspenso mirason nga illegal ang pagsuspenso kaniya maong seguro, iya pang huwaton ang hukom sa Court of Appeals didto sa kaulohan nga iyang gidangpan ug gipangayoan og temporary restraining order.

Dinhi sa atong nasud dili gyod ta makapaabot nga mosunod dayon ang mga tawo sa hukom sa hukmanan, mga quasi-judicial bodies ug mga administrative agencies tungod kay usahay kadudahan ang ilang mga hukom. Dinhi sa atong nasud adunay mga panahon nga ang mga hukom nga gipagawas wala ibasi sa tinuoray gayod nga tumong sa balaod. Sa Pilipinas double standard ang pagpatuman sa balaod. Ang balaod gipatuman depende sa kahimtang sa kihanti ug gikiha, gahom ug influencia ug dili gayod sa tinuoray nga tumong sa balaud. Mao kini ang hinungdan kun nganong si suspended governor Gwendolyn Garcia nagmakuli sa pagkanaug sa Kapitolyo. Ang gobernadora nagtoo nga nausahan ug napuhalan siya sa gahom ug influencia sa tag-as nga opisyal sa Malakanyang gawas sa pagtoo nga mopabor kaniya ang hukmanan.