Kuyawan ko ani

Dili imposible nga madeklarar nga illegal ang paggasto ni Mayor Michael Rama og P48 milyones gikan sa Special Education Fund (SEF) alang sa paghatag og cash assistance sa mga 4,800 ka maestra ug maestro dinhi sa dakbayan.

Ang Commission on Audit (COA) nangayo na sa mga dukomento nga naglambigit sa mao nga transaksyon. Nakaingon ko nga posible nga madeklarar nga illegal ang maong transaksyon kay bisan ang tulo ka department heads ni Rama misupak g’yud nga ang maong gasto adto ibanon sa SEF.

Sila si City Treasurer Emma Villarete, City Accountant Diwa Cuevas ug Budget Officer Nelfa Briones mitataw g’yud sa ilang suwat nga gipadala sa mayor nga illegal ang pag-charge sa cash assistance sa mga maestra gikan sa SEF.

Gitimbang-timbang nako ang isyu, ang baruganan sa tulo ka department heads mao nga dili sila supak nga hatagan ang mga maestra og tag P10,000 nga cash assistance isip bonus, apan dili lang gikan sa SEF kay wala ni masubay sa lagda.

Bisan og ang tulo ka department heads ni Mayor Rama mipahinumdom kaniya nga ang lagda sa paggasto sa SEF walay labut ang paghatag og cash assistance sa mga maestra, apan miinsistir g’yud si Rama.

Sa iyang usa ka pahina nga suwat nga gi-address sa tulo ka department heads, ang mayor nagkanayon nga ang paghatag og cash assistance sa mga maestra nasubay g’yud sa balaud ug gibasi sa rekomendasyon sa Local School Board.

Tan-aw hinoon nako, nag-inabogado si Rama kay sa iyang suwat wala niya itataw  nga ang salapi adto ibanon sa SEF.  Pero masabtan gihapon nga mao kini ang iyang gipasabut kay miingon man siya nga basi sa rekomendasyon sa LSB.

 Bilib ko ni Rama kay dihang gikuhaan nako og reaksyon kun unsay iyang himoon kun mandoan sila sa COA nga ipauli ang maong kwarta sa kagamhanan, matud niya nga andam siya nga magpapriso. Abi ninyo, si Rama miinsistir g’yud nga ang cash assistance sa mga maestra anha kuhaon sa SEF kay nagnihit man ang dakbayan og kwarta nga magamit. Unsaon, ang ubang kwarta gi-time deposit man bali’g lima ka tuig, ang uban ‘sab gi-freeze sa banko.

Basta kay gikuyawan g’yud ko nga ideklarar sa COA nga illegal ang maong gasto. Abtik gihapon si Rama kay ingon siya andam siya magpapriso ug wala siya moingon nga bayran niya ang kantidad kun madeklarar nga illegal.

Sayon ra man ang pag-ingon nga magpapriso kay nasayod man siya nga dugay kaayo kini nga mahitabo tungod sa paghimo og mga legal remedies. Buyno, huwaton nako ang kalamboan sa paghimo’g post audit sa COA.