BANAT EDITORIAL - Ang papel sa brgy sa anti-noise ordinance

Ang mga magbabalaod sa siyudad nag-umol og balaod pagsalbar sa publiko  gikan  sa kasaba o kalangas sa ilang  palibot  nga mugna sa mga tawong mapahimuslanon  ug  way kaikog sa ilang isig-kaingon, ang balaod  nga gitawag  og anti-noise ordinance. Kining maong  balaod  mahinungdanon kaayo  tungod  kay  mao kini ang bugtong  molaban  sa mga tawo  nga  dinaugdaog. Kay sa panahon  nga magsugod  na  ang hudyaka  sa usa ka  lugar  di lamang  sa  mga  balay kalingawan  kundi bisan kalingawan  nga alang  sa pista, kadtong  mga  estudyante, trabahante, mga masakiton, mga  senior citizen ug tanan  nga  mag-ugtas  sa kasaba  ug kalangas  sa palibot, way laing  mabuhat  gawas  nalang  sa pagpanungo  nga  unta  bahaan ug lunopan  ang  maong  hudyaka puslan  man aron mahunong. Unya  asa man  sila mosangpit  kun  ang  maong  kalangas gimugna  ra usab  sa mga  opisyal  sa barangay gumikan  lang sa gitawag  nga tradisyon  o pagtulon-an  sa ilang  relihiyon?

Unya  ang nakapait kay  bisan  pareho  og  relihiyon  ang  mga  opisyal  sa barangay  ug  kadtong  tawong  masakiton  nga magkonsimisyon  kun  saba  ang  iyang palibot  sa kagabhion, di man  mahimong  tungod sa pagka-managsama  nila  og  relihiyon di nalang  siya  moreklamo.

Unya  kun  moreklamo  siya, siya  pay isig-isigon  ug  mao  pay  hinginlan  nga  papahawaon  sa iyang  balay  kay lagi  di kapugngan  ang  ilang  hudyaka. Ang anti-noise ordinance angay  untang ipahabhab  sa  mga  opisyal  sa barangay  kun  di  sila kaantigo  mosabot  ug  mopasulod  niini  sa ilang utok. Kay  sa  usa  ka  lugar  diin  sila maghudyaka  di man  gud  tanan  makauyon sa kasaba  ug kalangas  nga  ilang  buhaton. Kun ingon niini  ang sitwasyon  , ang  mga  opisyal  sa barangay  nga may  igong  pangutok mangita  og  lugar  nga  layo  sa kabalayan  kun gusto silang maghudyaka  nga  binuntagay.

Kun ugaling, way laing dapit, nganong  di man mohatag  og  limiti  sa maong hudyaka  nga  ubanan  og maayong  pamatasan sa  pagpahibawo  pinaagi sa  sound system nga mangayo  og dispensa  nga  kutob  sa alas 11:00  sa gabii  magsaba-saba kamo  sa palibot  aron  may paabuton  ang  mga  masakiton nga oras diin sa pag-abot  sa maong  higayon, libre  na  siya  nga  makatulog  kay mahilom na ang  hudyaka  sa iyang  palibot.  Ug di  kay bisan lapas  na  sa tungang  gabii  hangtud  magbuntag pasagdan  lang  ang kasaba  sa palibot nga  di gani makapangayo  og  dispensa  sa iyang  mga  silingan  kay  nagtuo  nga  kumo kay tradisyon  sa ilang  relihiyon nakaayon na  ang  tanan  niyang  tagi-barangay.

Ug angay masabtan sa  mga  opisyal  sa barangay  ang ka-elementarya  ning  maong  balaod nga nagmando kanila isip  maoy nag-una  nga  tigpatuman  niini  sa ilang  barangay.