Burukrasya sa helmet

Dihang gilangay ang pagpatuman sa balaod nga nagtakda sa tukmang helmet nga isul-ob sa mga magsakay og motorsiklo, nagmingaw ang mga buhatan sa Department of Trade and Industry (DTI). Nga maoy gitahasan sa pag-umol sa mga lagda nga angay’ng sundon sa mga pabrika sa helmets ug pagsusi kun nakapasar ba ang helmets sa mga lagda.

Ang Department of Transportation and Communication (DOTC) nipahibawo nga hingpit nang ipatuman ang helmet law karong Enero 1, 2013. O usa ug tunga ka buwan na lang gikan karon. May sukaranan ang kabalaka sa DTI nga magpunsisok na sang ilang mga buhatan sa kataposang adlaw sa giinat nang lugway.

* * *

Nasaksihan nakong kabugnaw sa mga tag-iya og motorsiklo pagpasusi sa ilang helmets atol sa pagsalmot sa DTI sa Grand Halad sa Kapamilya sa Cebu Technological University (CTU) Main Campus niadtong Sabado. Mas gamay ang nanunga kay sa dul-an sa libo nga naghuot sa Grand Halad sa Kapamilya sa Cebu Normal University (CNU) niadtong Hunyo.

Giawhag namong kadagkoan sa DTI pagpahibawo sa umaabot nga venues sa ilang offsite inspections aron makatabang mi pagpahibawo sa publiko pinaagi sa radyo ug telebisyon. Hinaot nga makatabang mi og pahinumdom sa mga hingtungdan nga di sila angay’ng maghuwat nga mag-ilogay na sab sa kataposang mga adlaw.

* * *

Mokumpisal hinuon ko nga hangtod karon maglisod ko og tuo sa kadaghan sa mga sapaw sa burukrasya sa pagtino sa kaluwas sa helmets sa mga motorsiklo:

· Kongreso ang niumol sa helmet law (Republic Act 10054) nga way igong konsultasyon sa nagkalainlaing sektor;

· DOTC ug DTI ang naghimo sa implementing rules and regulations (IRR);

· DTI ang nihatag og lagda sa mga pabrika unsay tukma nga helmets nga angay’ng himuon;

· DTI ang nilista sa mga pabrika nga nakatuman sa mga lagda;

· DTI ang mosusi sa helmets kun nakapasar ba gyod sa mga lagda; ug

· Land Transportation Office (LTO) kon ang helmets nga gisul-ob sa mga motorista na-inspeksiyon ug nakapasar ba gyod sa DTI.

* * *

Kun hapit ka malipong nga nagbasa sa nasuwat sa ibabaw, di kong kabasol nimo. Aron pagtabon sa ilang kapakyas pagpalambo sa industriya sa transportasyon (DOTC ug LTO) ug pagpanalipod sa mga konsumidor (DTI), nag-imbento na lang og mga gimbuhaton aron ingnon nga duna silay nahimo.

Mahimo untang mas luwas ang kadalanan alang sa mga motorista ug mga pasahero kun ang kamao rang mga drayber ang hatagan og lisensiya, lig-on rang mga sakyanan ang irehistro ug himuong mas luwas ang kadalanan. Di hinuon ni lusot alang sa mga tag-iya ug angkas sa motorsiklo nga magpalit lang og kabo o plato aron maoy itabon sa bililhon uyamot nilang mga ulo.

* * *

Email: leo_lastimosa@abs-cbn.com