Wa pay eleksiyon, Tommy ug Mike nag-away na

Best friend, best enemy. Karaang panultihon nga gimatuod nilang Mayor Mike Rama ug Congressman Tommy Osmeña ning panahon ta karon. Kaniadto tipon ra sila sa usa ka kaldero. Apan karon lainlain na! Kinsa ba gyud nilang duha ang palaaway? Ug nganong mag-away man gyud sila?

Nindot ba sa mga mata sa katawhan kining ilang gihimo? Lider baya silang duha. Dapat, mogambalay og matahom nga ehemplo. Dapat, maghuyhoy, magtinabangay ug mag-agbayay. Apan unsa bay ilang gihimo? Nagkinihaay. Nagpasuyaay?

Si Rama mikiha ni Osmeña kay ang gidonar nga sakyanan para sa City Hall, atua mahipunta sa igsuon sa Kongressman. Agi’g tubag, wala lang atubanga sa labihang kalig-on ni Tommy ang maong kaso; kun dili gipasuya pa niya’g maayo si Mike.

Nakig-uli si Osmeña ni Eddiegul, ug sa ilang panaghiusa’g usab giregalohan ni Tommy si Eddiegul pinaagi sa pagsaad nga mohatag og P400M-budget alang sa road widening project sa unang distrito. Gumikan ning maong kasayoran, naguba ang dughan ni Mike, kay alang niya ang maong salapi, dili angay mahipunta didto; kun dili, anhi gyud dapat sa siyudad. Resulta, mipayil na sab siya’g laing kaso. Nga maoy nakapadilaab pag-ayo sa ilang away.

Nakita man gud ni Rama, nga ning gibuhat ni Osmeña sama ra nga gitalikdan sa kongresman ang mga lumolupyo sa siyudad sa Sugbo, kinsa siya maoy nag-alagad kanhi ug ning umaabot piniliay si Osmeña magpapili na sab. Niining hukom ni Tommy nga adto niya ibubo ang P400M nga proyekto sa unang distrito imbes dinhi sa dakbayan, unsa man kahay bation sa mga taga siyudad? Malipay ba? Natural, mahiubos gyud! Kay na-feel man nato nga di diay ta niya pinangga.

Mao nga si Rama mi-react. Mihimo’g lakang sa pagpugong. Iya ning gibuhat dili para niya. Kun dili, para sa katawhan ning dakbayan. Si Rama baya ang nangamahan sa siyudad karon. Busa, buhaton gyud niya kutob sa unsay iyang mahimo nga kapanalipdan ang interest sa mga lumolupyo, kinsa ubos sa iyang pag-amuma ug pagmahal. Gugma sa usa ka mapinanggaong amahan kining gipakita ni Mike kanato. Samtang kang Tommy...unsa man? My dear readers, inyo na ang paghukom.

Sunod tuig pa ang eleksiyon. Apan wala nay hunong ang away nilang Mike ug Tommy. Dinhi atong mahibaw-an kinsa sa duha ang hingamigo ug kinsa ang palaaway? Kinsa nila ang mapinanggaon ug si kinsa ang madinumtanon? Kinsa nila ang mapaubsanon ug si kinsa ang mapahitas-on?

At least, may sumbanan na ta sa pagpili kinsa nila ang angay himuong mayor sa tuig, 2013.