Sakaynaygon

Bitoy: Ate kuya ayaw mo’g kahadlok dili mi mga esnatser, dili mangongoot tinarong ning amo, one two three!!! Sounds familiar?

Laing reklamo na sab ang akong nadawat sa usa ka ginang ining mga manaygonay sulod sa dipasayroang sakyanan.

Matud pa sa nagreklamo dili ang paghatag og kwarta ang iyang naproblemahan. Ang iyang nahadlokan nga tugkan siya og nerbiyos tungod sa kahadlok nga basin og unsay buhaton   kun dili mahatagan.

Nahinumdom lang ko dihay nanaygon:

Bitoy: We wish you a merry Christmas, we wish you a merry Christmas.

Mana: Dong… dong……. Way tawo diri…

Bitoy: Ikaw diay nang?

Mana: Radyo ni dong radyo (Toink!/Aguy!)

Hehehehehehehehehehehehe!

Dali ra tinuod kaayo ang pagbalibad sa mga manaygon sa atong panimalay apan sulod sa dipasayroan kutob ra gyud ka sa paglingoglingog, pagtulogtulog ug pagbantay basin kalit lang birahon ang unsay imong gidala.

Mana: Ay tabang!!! Gilabnihan ko atong nanaygon oy!!!!!

Bitoy: Wa man sad ka magbantay Mam.

Mana: Nadala man sad ko gud ko sa iyang kanta oy dili man sa pasko.

Bitoy: Unsa may gikanta?

Mana: Love song(Toink!/Aguy!)

Hehehehehehehehehehehehe!

Nangutana ang nagreklamo nako nga mihangyo nga dili lang ilhon ang iyang ngalan unsa may gibuhat sa kapolisan?

Una kun ang mga manaygon mosakay lang ug mokanta unsa may ikaso?

Ikaduha kun magamit ang anti-mendicancy ordinance batok nila sulosyon kaha ang pag-abog lang ning mga bataa?

Ikatulo sagad mga menor de edad naghimo ini hinumdomi nga protektado sila sa juvenile act.

Ikaupat gawas nga imposible ang pagbutang og mga polis matag dipasayroan ug ato sang paatangan mahimo sab silang monaog sa dili pa moabot sa lugar nga dunay polis.

Ang nakalisod og:

Pasahero: Hoy! Nanaygon mo dakpon gani mo sa polis na.

Bata: Dili nang oi dili midakpon…

 Pasahero: Ngano man?

Bata: Dili ma ni amo tulis

Pasahero: Unsa man diay ni.

Bata: Para sa polis (Toink!/Aguy!)

Hehehehehehehehehehehehehehehehe

Duna may mas labing importante nga angayang atimanon ang atong kapolisan hinaot dili nila hingpit ibalewala ning maong mga reklamo. Dili man direkta apan tataw nga ang mga dagkong bukton sa mga hingkod na nga manaygonay maoy ilang gihimong lamas sa ilang kanta aron mahadlok ug mapugos paghatag ang mga pasahero.

Tawhanon man ang pagtabang dili na makiangayon kun mohatag ka tungod kay duna kay gikahadlokan.

* * *

(emailad:[email protected])