Mamahimo bang magminyo ang ig-agaw?

Kining gugma matud pa, di gyud nimo matudloan ug di sab nimo madiktahan ug bisan sa imong kaugalingong anak di ka makabuot kun kinsay iyang higugmaon. Mao ni kasagarang problema sa mga ginikanan ilabi na kadtong naggikan sa adunahang pamilya hinungdan nga ila na lang ibuya ang ilang mga anak. Apan adunay uban nga mobati og gugma bisan sa ilang kadugo ug ang dakong pangutana kun mamahimo ba silang magminyo? Kana nga pangutana ang atong tubagon karon sa atong column.

Dear Atty. Divine,

Naaghat ko sa pag-email sa imong column tungod sa problema sa akong igsuon. Ang akong igsuon nga babaye adunay hinigugma karon nga amo rang kadugo o paryente. Nasayud na silang daan nga ig-agaw sila atty apan ila gyud gihapong gipadayon ang ilang relasyon. Ang among mga ginikanan wa pa masayud niini apan dako ang akong pagtuo nga kun mahibawo ang among ginikanan mosupak gyud sila sa maong relasyon.Bisan unsaon namo og discourage ang among igsuon atty di man gyud mopatuo kay nahigugma man gyud siya sa among ig-agaw. Ang akong gikabalak-an atty kun adunay mahitabo kanila ug momabdos ang akong igsuon. Ang akong pangutana kun mamahimo ba ni silang magminyo nga ig-agaw man sila? Unsa kahay angayan nakong buhaton? Hinaut imo kong matambagan sa akong problema.

 Joey”

Dear Joey,

Salamat sa imong pag-email. Wa nimo masulti sa imong email kun ikapila sila nga degree nga ig-agaw. Ubos sa atong Family Code sa Article 38 adunay matang sa kaminyuon nga makonsiderar nga void ug dili balido for reasons of public policy kini naglakip sa kaminyuon

“Between collateral blood relatives, whether legitimate or illegitimate, up to the fourth civil degree” buot ipasabot niini nga dili mamahimong magminyo ang first cousins bisan pa kun legitimate or illegitimate ang ilang relasyon kay gikonsiderar ni sa balaod nga void. Ang first cousins mao ni gipasabot sa atong balaod nga fourth civil degree. Ang pagdili niini gibasi sa medical ug cultural grounds. Sa medical nga aspeto, gituyo kini tungod sa posibilidad nga aduna unyay genetic defects ang mamahimong anak sa magtiayon nga mag-agaw. Sa cultural ground usab, kitang mga Filipino ang first cousins suod ug duol pa kaayo nato na nga paryente busa dili maayong paminawon nga magminyo ang imong anak ug ang anak sa imong igsuon. Sa ato pa, kun ang karelasyon sa imong igsuon karon paryente ninyo apan layo na kaayo mamahimo silang makaminyo. Ang maayo nimong buhaton mao ang pagkombinser sa imong igsuon nga iyang sultian ang inyong mga ginikanan labot sa iyang pagpakigrelasyon sa inyong paryente samtang sayo pa kay dili maayong paminawon ug mas masuko ang inyong mga ginikanan kun adto na sila masayud sa laing tawo. Hinaut nahatagan ka og katin-awan sa akong tubag sa imong pangutana.

Atty. Divine

Laing gidid-an sa atong balaod nga magminyo mao ang magsuon, whether legitimate or illegitimate ug ang ascendants ug descendants of any degree sama sa apuhan og apo, ginikanan ug anak, ug mao ni gitawag og incestuous marriages. Sa Article 38 sa Family Code gidid-an sab sa pagminyo ang step-parents ug step children, parents-in-law ug children-in-law, adopting parent og adopted child, surviving spouse of the adopting parent ug adopted child, surviving spouse of the adopted child ug adopter, adopted child ug legitimate child of the adopter, between adopted children of the adopter ug ang si bisan kinsa nga mopatay sa bana or asawa aron iyang maminyu-an ang nahibiling bana o asawa gikonsiderar sa balaod nga void ang maong kaminyu-on.

Kun aduna mo pangutana, ipadala lang sa Legal Corner sa Banat News or email sa [email protected]. og akong tubagon ang inyong pangutana matag adlawng Mercules og Domingo.