Ang mga lakang sa paghiusa sa mga politiko

Sa natad sa politika dili na bag-o sa mga politiko ang paghiusa sa managkalahing partido sa mga politiko taliwala sa hilabihan nga kainit sa paglinabayay og mga init nga isyu sa panahon sa ilang pagpangampanya dihang nagkaatbang kini og gibarogan nga partido.

Kun magkahiusa ang atong mga politiko maoy makapabor ang katawhan nga ilang gialagaran kay wala ug tuo man ang pagdawat sa mga kaayohan ug walay bikil kay nagkausa man ang ilang mga baroganan.

Sa mga dapit dinhi sa Sugbo nga magsilbing ehemplo sa kahimtang politikanhon mao ang dakbayan sa Mandaue nga hilabihan kainit ang panag-atbang sa mga politiko nga naghupot sa katungdanan.

Sa paghisgot sa dagan sa politika sa nangaging panahon kini nasinati dihang naglingkod pa sa katungdanan si kanhi Mayor Alfredo Ouano nga gilibotan ang iyang administrasyon sa mainiton kaayong mga pundok sa oposisyon.

Matud pa nila nga sa maong kahimtang dili ikalimod nga naapektohan usab ang pagpatuman sa batakang serbisyo nga gikinahanglan sa mga Mandauehanon sanglit kanunay man nga barawon iyang kalihokan sa iyang mga kaatbang nga misangko pa gani sa pagpasaka og daghan nga mga kaso ngadto sa korte niadtong panahona.

Nag-atubang og daghang mga kaso si kanhi Mayor Pedong Ouano apan lagi tungod kay gitumong man lang sa politikanhong katuyoan maoy hinungdan nga ang maong mga kaso batok kaniya gipangbasura sa korte sa pagpanglabay sa daghang katuigan.

Taliwala sa mga nasinati ni kanhi Mayor Pedong Ouano nga mga kakulian sa gihapon wala kini niya igsapayan ug gani nagmalampuson pa siya sa paghiusa sa mga politiko nga kanhi nahimo niyang kaatbang.

Apan ang iyang gihimo adunay kinutoban sanglit nahibalik man gihapon ang panag-atbang sa mga nagsunod kaniya nga mga politiko sa dakbayan nga niining panahona gitinguha na usab ang mga lakang sa paghiusa sa mga politiko sa dakbayan nga nagpasabot nga ang dili kauban kaniadto mahimong kauban na karon. (Romeo T. Limpangog)