Pakisusi sa milagro

Ang milagro nga nakapadali sa pagka-Santo ni Beato Pedro Calungsod nahitabo sa Dakbayan sa Sugbo siyam ka tuig ang nilabay. Opisyal nga mga dokumento nga ipagawas sa Vatican sa pinulongang Latin sa di madugay magbutyag nga ang milagro nahitabo sa usa ka pribadong tambalanan sa alas-6 sa gabii niadtong Marso 26, 2003. Tulo ka tuig human si Calungsod gi-beatify ni Papa Juan Pablo II sa Roma sa Marso 5, 2000 ug 331 ka tuig human siya gipatay sa mga Chamorro sa Guam niadtong Abril 2, 1672.

Apan mga dokumento moila sa labing unang higayon sa doktor ug pasyente nga nahilambigit sa milagro. Nga napamatud-an sa Vatican niadtong 2005 human sa duha ka tuig nga makuting pakisusi.

* * *

Sukwahi sa nahaunang mga pagtuo, di ang pasyente ang nangaliya ni Calungsod. Ang pasyente nga taga Eastern Visayas wa kaila ni kadungog sa ngan ni Calungsod. Wa na sab siyay panimuot. Nahiagom siya sa labing lisod nga matang sa coma human sa operasyon sa iyang kasingkasing. Gituohan gani nga mamatay pagka sunod adlaw.

Ang nagpakitabang sa bag-ong Beato mao ang doktor. Kinsa nahasol pag-ayo sa gidangatan sa pasyente. Labi na nga gipasaligan niya ang mga paryente nga dako ang kahigayonan sa kalamposan sa operasyon ug gidasig niya sila sa pagpangita sa dakong kuwarta nga gikinahanglan sa operasyon. Maong may abundang sukaranan ang mga tagtungod sa pasyente sa pagmahay sa doktor. Gawas nga nag-ungaw sa kamatayon ang pasyente, may dako pa gyud silang utang.

* * *

Tanan niyang nakat-onan sa kapin sa dekada niyang pagtuon ug sa mas dugay niyang pagtuman sa iyang propesyon nagtug-an sa doktor nga mamatay nang iyang pasyente sa mosunod nga 24 oras. Nahimo na niya ang tanan, ginamit ang kinatibuk-an niyang katakos ug ang labing bag-ong kahimanan ug teknolohiya sa tambalanan. Maong wa na siyay laing kadangpan. Gawas sa paghangad sa langit. Ug pagsangpit sa usa sa labing bag-o ug batan-ong Beato.

Upat ka oras human sa iyang pangaliya, ang doktor maoy labing nakugang: Nakamata ang iyang pasyente, nga di nang kasulti, ni kabuka sa iyang mata, ni makabatyag sa bisan asang bahin sa iyang lawas, nga mora og wa lay nahitabo.

* * *

Matud ni Msgr. Ildebrando Leyson, postulator o tagduma sa canonization ni Calungsod, ang doktor maoy nanawag sa artsidyosesis ug niboluntaryo sa kasayuran. Nga wa dayon nila tuohi. Gipatawag ni Cebu Archbishop Emeritus Ricardo Kardinal Vidal ang labing bantogang mga doktor sa nasud pagtuki sa insidente.

Human sa duha ka tuig, napamatud-an sa mga doktor nga gitigom sa Vatican nga di ikapasabot sa siyensiya ug medisina ang pagkaayo sa pasyente. Sa niaging tuig, napamatud-an sa Vatican ang milagro. Maong makaangkon ang Sugbo ug ang kalibotan sa labing unang Bisaya nga Santo karong Oktubre 21. 

* * *

Email: [email protected]