Pag-promote sa Sugbo
Nagtuo ko nga hangtud ron di bintahaan ang Sugbo sa mga butang nga sarang ikadalit niini ngadto sa mga turista.
Adunahan ang Sugbo sa kultura, kabilin ug sa mga maayong talan-awon ug kabaybayonan nga sa turista lisud balibaran.
Gani sa labing awahi nga listahan nga gipagawas sa BBC kon British Broadcasting Network ang Sugbo nalakip sa lima ka mga dapit sa nasud nga paboritong adtoon sa mga turista.
Apan daw sa hinay-hinay'ng giilog ang kabantog niini sa Camarines Sur.
Ang Camsur mituyhakaw sa kainila diha sa natad sa turismo tungod sa water sports tourism niini.
Ang makalingaw nga wake boarding misikat og maayo ug gidayo sa mga turista.
Aron di mabiyaan sa promotion ug magpabilin ang kainila sa atong dapit sa natad sa turismo, tinguha ron sa administrasyon ni Gobernador Gwendolyn Garcia ang pagkuha sa serbisyo sa usa ka advertising firm aron pag-promote sa Sugbo.
Tinguha ni Garcia sa maong lakang dili lang ang pagbaligya sa turismo sa Sugbo kun dili lakip na ang pag-agni og mga negosyante nga mobubo og puhonan. Kun ang mga nasud sama sa Malaysia, Thailand ug Singapore imong makita nga mibayad sa mga international television network pag-promote sa ilang dapit, nganong dili man tinuod kini himuon sa Sugbo?
Mamahimong makabenepisyo si Garcia sa maong lakang tungod kay sayod kita nga nagtinguha siya sa pagpapili pagkasenador.
Mamahimo sab nga lansis kini niya aron pagbaligya sa iyang kaugalingon ngadto sa mga butante sa tibuok nasud.
Apan ang kahigayonan sa investments nga makuha sa probinsiya gikan niini labaw kay sa political benefits nga maangkon sa gobernador.
Gikinahanglan lang hinuon nga sigurohon nga ang Sugbo gyud maoy mahimong sentro sa promotion ug dili ang gobernador.
* * *
- Latest
- Trending
